ჩვენ გვაქვს სტრატეგიული ინტერესი, რომ ქვეყანაში ჰესები აშენდეს იმისათვის, რომ მივაღწიოთ ჩვენს სტრატეგიულ მიზანს - 2030 წლისთვის მოხმარებას გადააჭარბოს წარმოებამ,- ამის შესახებ გადაცემა "გადაწყვეტილებაში" პრემიერ-მინისტრმა ირაკლი კობახიძემ განაცხადა.
მისივე თქმით, ეს არის მნიშვნელოვანი იმისთვის, რომ ენერგეტიკული დამოუკიდებლობა იყოს მიღწეული.
"დარწმუნებული ვარ, რომ გაგრძელდება კონკრეტული NGO-ების აქტივობა და ეს იქნება გარედან დაფინანსებული. ყველანაირად ეცდებიან, რომ ჩვენ ვერ მივაღწიოთ სტრატეგიულ მიზანს - ენერგეტიკულ დამოუკიდებლობას. როდესაც გამჭვირვალე გახდება ამ სფეროში დაფინანსება, ყალბი ეკოლოგიური ნარატივით ვერ შეიფუთება მათი ანტისახელმწიფოებრივი მიზნები. როცა ჩვენ წარმოვაჩენთ იმას, რომ კონკრეტული დონორი ორგანიზაციები ხელოვნურად ცდილობენ, NGO-ების მეშვეობით, ამ ქვეყანაში სტრატეგიული ეკონომიკური პროექტების დაბლოკვას და სტრატეგიული მიზნის შესრულებისთვის დაბრკოლების შექმნას - აქ უკვე ძალიან გაუჭირდებათ მათ ასეთი პროექტების დაფინანსება. პირდაპირ წინ ვერ აღუდგებიან ქვეყნის ენერგეტიკულ დამოუკიდებლობას. ეს პრინციპი მოქმედებს ყველა შემთხვევაში, როცა საქმე ეხება გამჭვირვალობას", - აცხადებს ირაკლი კობახიძე.
