იაპონიის ტრანსპორტის სამინისტროს ოფიციალურმა პირებმა Toyota Motor-ის სათავო ოფისში მოკვლევის პროცესი დაიწყეს. ღონისძიებები მას შემდეგ დაიწყო, რაც კომპანიის ზოგიერთი მოდელის ავტომობილის სერტიფიცირებაში გარკვეული ხარვეზები გამოვლინდა.
ავტომობილების სერტიფიცირების ტესტებში ხარვეზების აღმოჩენის შემთხვევები Toyota-ს მოდელ Daihatsu-ს მანქანების განყოფილებაში დაიწყო, სადაც უსაფრთხოების ტესტებში უზუსტობების გამო სკანდალი დაიწყო და სხვა იაპონურ ავტომწარმოებლებზეც გავრცელდა. თუმცა, Toyota, რომელიც უსაფრთხოებისა და საიმედოობის გამო, დიდი ხანია თავისი რეპუტაციით ამაყობს, ჯერჯერობით, ერთადერთი ავტომწარმოებელია, რომელმაც ადგილზე მიიღო ტრანსპორტის სამინისტროს წარმომადგენლები შემოწმებისთვის.
იაპონიის ტრანსპორტის სამინისტრომ ინსპექტირების ჩატარების გეგმები ერთი დღით ადრე გამოაცხადა, როდესაც თქვა, რომ Toyota-ს, Mazda-ს, Honda-ს, Suzuki-ს და Yamaha Motor-ს ავტომობილების სერტიფიცირებისას, წუნდებული ან მანიპულირებული მონაცემები ჰქონდათ წარდგენილი.
მას შემდეგ, რაც იაპონიის ტრანსპორტის სამინისტრომ მათი მოდელების სერტიფიცირების განაცხადში დარღვევები აღმოაჩინა Toyota-მ ბოდიში მოიხადა.
მსოფლიოს უმსხვილესი ავტომობილების მწარმოებელთა თავმჯდომარე აკიო ტოიოდამ განაცხადა, რომ Toyota Group-ის კომპანიებში, რომლებიც მოიცავს Daihatsu-ს, სატვირთო მანქანების ბრენდს Hino-ს და თავად Toyota-ს, "სწორი სერტიფიცირების პროცესი" არ იყო დაცული.
Toyota-მ და სხვა იაპონურმა ბრენდებმა - Mazda-მ და Yamaha-მ, ტრანსპორტის სამინისტროს დასკვნის შემდეგ ზოგიერთი ავტომობილის გადაზიდვა ან გაყიდვა დროებით შეაჩერეს. სამინისტრომ ასევე, დაასახელა სხვა იაპონური მწარმოებლები - Honda და Suzuki, რომლებსაც ასევე, დარღვევები აქვთ სერტიფიცირების განაცხადში.
