1714575600

ავსტრალიის უნივერსიტეტის მკვლევრების განცხადებით, მათ შეიმუშავეს ახალი ქიმიური პროცესი, რომელსაც შეუძლია ნაგავსაყრელებიდან გამოყოფილი აირიდან მდგრადი საავიაციო საწვავი აწარმოოს. ეს კი, თავის მხრივ, სათბურის გაზების გამონაბოლქვს შეამცირებს.მკვლევრების განმარტებით, მათ არათერმული პლაზმური ტექნოლოგია გამოიყენეს, რომელიც ნორმალურ ატმოსფერულ პირობებში მაღალენერგიულ ელექტრონებს ასხივებს ნაგავსაყრელებიდან გამოყოფილ მეთანსა და ნახშირორჟანგში. შედეგად, იწყება გაყოფისა და შეერთების პროცესი, სადაც ნახშირბადი და წყალბადი ერთმანეთთან აკავშირებს გრძელი ჯაჭვის ნახშირწყალბადებს.„ჩვენ ვიღებთ სინერგიულ ეფექტს, რომლის დროსაც შეგვიძლია კონვერტაციის პროცესის მეშვეობით, მივიღოთ იაფი ან შესაძლოა, უფასო ელექტროენერგია და გამოვიმუშაოთ სასარგებლო ქიმიკატები“ - განუცხადა Reuters-ს სიდნეის უნივერსიტეტის პროფესორმა პ.ჯ. კალენმა.მისივე თქმით, ელექტრიფიკაცია მსოფლიოს მიზნის - წმინდა ნულოვანი ემისიების მისაღწევად, გადამწყვეტია. თუმცა, მძიმე ინდუსტრიებში, როგორიცაა ავიაცია და გადაზიდვები, ელექტრო ელემენტების გამოყენება ამჟამად შეუძლებელია.ავიაცია ნახშირბადის გლობალური გამონაბოლქვის დაახლოებით 2-3%-ს გამოყოფს. ამ ემისიების შემცირების გასაღები მდგრადი საავიაციო საწვავია, მაგრამ ის ძვირია და გლობალურად, თვითმფრინავების საწვავის ერთ პროცენტზე ნაკლებს ფარავს.გლობალური საავიაციო ინდუსტრია ეყრდნობა მდგრადი საავიაციო საწვავის (SAF) წარმოების ზრდის პერსპექტივას, რათა 2050 წლისთვის ნახშირბადის "ნულოვან" მიზანს მიაღწიოს. თუმცა, უკვე ბევრი ავიაკომპანია წუხს მიწოდების სიმცირესა და ფასზე - ის დაახლოებით სამ-ხუთჯერ ძვირია, ვიდრე თვითმფრინავის ტრადიციული საწვავი.მკვლევრები ამბობენ, რომ მათ მიერ დაწყებულმა პროცესმა შეიძლება, გაამარტივოს საავიაციო ინდუსტრიის ემისიების შემცირების პროცესი.„ერთი მხრივ, ჩვენ გვაქვს იდეა, რომლის თანახმადაც, ვაპირებთ ნაგავსაყრელის ემისიები შევამციროთ და გამოვიყენოთ, მეორეს მხრივ, კი გვყავს სექტორი, რომელსაც ნამდვილად სჭირდება ახალი ტექნოლოგია, უფრო მდგრადად გარდაქმნისთვის“, - ამბობს პროფესორი კალენი.მეცნიერების განმარტებით, მეთანი უფრო მეტად დამაბინძურებელია, ვიდრე ნახშირორჟანგი - ის ატმოსფეროში რამდენიმე წლის განმავლობაში იშლება, ნახშირორჟანგს კი, ამისთვის ათწლეულები სჭირდება. ეს ნიშნავს, რომ მეთანის ემისიებს შეუძლიათ, უფრო სწრაფი გავლენა მოახდინონ კლიმატზე.მეთანის ემისიები ადამიანთან დაკავშირებული ისეთი საქმიანობებიდან წარმოიშობა, როგორიცაა ნაგავსაყრელები, ნავთობისა და ბუნებრივი აირის წარმოება და სოფლის მეურნეობა. მიჩნეულია, რომ ინდუსტრიული რევოლუციის შემდეგ, გლობალური ტემპერატურის ზრდის დაახლოებით მესამედი მეთანზე მოდის.ნარჩენების და ენერგიის მართვის კომპანია Veolia's ავსტრალიისა და ახალი ზელანდიის აღმასრულებელი დირექტორი რიჩარდ კირკმანი ამბობს, რომ ავსტრალია ყოველწლიურად 28 მილიონ ტონა ნარჩენს წარმოქმნის.”მთელი ნარჩენი, რომელსაც ჩვენ ვაწარმოებთ ავსტრალიაში - საყოფაცხოვრებო თუ ბიონარჩენები, შლამის წყლის დამუშავებიდან წარმოქმნილი ნარჩენი - შეიძლება გადაიქცეს ენერგიად. ამას შეუძლია შეავსოს ავსტრალიის ენერგომომარაგების დაახლოებით, 10 პროცენტი. ეს იქნება უზარმაზარი წვლილი კლიმატის ცვლილების შერბილების თვალსაზრისით“ - თქვა კირკმანმა.გასულ წელს, დუბაიში გამართულ გაეროს კლიმატის სამიტზე თითქმის 200 ქვეყანა დათანხმდა, სწრაფად და არსებითად შეამციროს მეთანის ემისიები UAE-ის კონსენსუსით. ეს შეთანხმება დაემატა 150-ზე მეტი ქვეყნის მიერ მანამდე აღებულ წინა ვალდებულებას - მეთანის გლობალური ემისია 2020 წლის დონიდან მინიმუმ, 30%-ით შეამცირონ ამ ათწლეულის ბოლომდე.

1714144020

იაპონური ავტომწარმოებლები Nissan და Mazda ჩინეთის კონკურენტულ ავტობაზარზე დაბრუნებას გეგმავენ.Mazda-ს აღმასრულებელი დირექტორი მასაჰირო მორო ამბობს, რომ ეძებენ ჩინურ ბაზარზე გზებს, მაგრამ, ამასთან, ეს უნდა იყოს მდგრადი ტემპით დაბრუნება.„ჩინეთი ახლა სუპერ კონკურენტუნარიანი ბაზარია. აქ 130-ზე მეტი ბრენდია კონკურენციაში. Mazda-სთვის წარმატების გასაღები არის ის, რომ შევძლოთ უფრო ჭკვიანი ტექნოლოგიების მიწოდება, ელექტრიფიკაცია, რაც აერთიანებს Mazda-ს უნიკალურ ღირებულებებს. მომხმარებლები ნახავენ, რომ Mazda არის ძალიან დიდი ბრენდი და მოუნდებათ მისი ყიდვა“ ,- ამბობს მასაჰირო მორო.პეკინში გამართულ ჩინეთის უდიდეს ავტო შოუზე იაპონურმა ავტომობილების მწარმოებლებმა Nissan-მა და Mazda-მ თავიანთი უახლესი ელექტრო მანქანები (EV) წარმოადგინეს.იაპონური ავტომობილების კომპანიები სულ რამდენიმე წლის წინ, ჩინეთში ერთ-ერთი ყველაზე ცნობილი უცხოური ბრენდი იყვნენ. თუმცა, ბოლო წლებში ისინი მომხმარებლების გარეშე დარჩნენ - მას შემდეგ, რაც ადგილობრივმა მწარმოებლებმა, BYD-ის ხელმძღვანელობით, ბაზრის წილი პროგრამული უზრუნველყოფით დატვირთული ელექტრო მანქანებით მიიტაცეს.ახლა, უცხოელი ავტომწარმოებლები იბრძვიან, რათა აჩვენონ, რომ შეუძლიათ აქტუალობის შენარჩუნება ამ ბაზარზე და ელექტრომობილებზე გადასვლის ზეწოლის ფონზე, ცდილობენ კონკურენტულობის შენარჩუნებას.

1714058040

საერთაშორისო სამეცნიერო საბჭოს მკვლევრებმა ანგარიში გამოაქვეყნეს, რომელშიც მთავრობებს მოუწოდებენ, შეაფასონ ახალი ტექნოლოგიები.ანგარიშის წამყვან ავტორს პიტერ გლუკმანს ინტერნეტის გაჩენის მაგალითი მოჰყავს, როგორც რეგულირების ხელიდან გაშვებული შესაძლებლობა და ამბობს, რომ პოლიტიკოსებმა უნდა შეაფასონ ხელოვნური ინტელექტის რისკები და სარგებელი.„ვთქვათ, ჩვენ ვიყენებთ ხელოვნურ ინტელექტს განათლების პერსონალიზებისთვის ან ფსიქიკური ჯანმრთელობის სამკურნალოდ. ეს ალბათ ძალიან კარგია, მაგრამ არის სხვა მოსაზრებები, რომლებიც გასათვალისწინებელია - მაგალითად, შესაძლო ზიანი. ჩვენ გვჭირდება ანალიტიკური ჩარჩო, ამ საკითხებზე ფიქრისთვის. როდესაც ინტერნეტი განვითარდა, ყველამ თქვა, რომ ეს იქნებოდა შესანიშნავი - ის გვპირდებოდა მსოფლიოს დემოკრატიზაციას, ინფორმაციის გაზიარებას. იყვნენ ადამიანები, რომლებიც მაშინაც კი ამბობდნენ, რომ მას გარკვეული კონტროლი უნდა ჰქონდეს, რადგან ეს შეიძლება გახდეს დეზინფორმაციის წყარო და ა.შ. რა მოხდებოდა, თუ ჩვენ მაშინ დავიწყებდით ინტერნეტის რეგულირებას გლობალურად, ისევე, როგორც ჩვენ ვარეგულირებთ ტელეკომუნიკაციებს? რეალურად გვექნებოდა იმდენი პრობლემა სოციალურ მედიასთან, როგორც ახლა?“, - ამბობს პიტერ გლუკმანი.მარტში გაეროს გენერალურმა ასამბლეამ ერთხმად მიიღო პირველი გლობალური რეზოლუცია ხელოვნური ინტელექტის შესახებ, რომელიც მოუწოდებს ქვეყნებს, დაიცვან ადამიანის უფლებები, პერსონალური მონაცემები და აკონტროლონ ხელოვნური ინტელექტის რისკები.არასავალდებულო რეზოლუცია, შემოთავაზებულია შეერთებული შტატების მიერ და თანადაფინანსებულია ჩინეთისა და 120-ზე მეტი ქვეყნის მიერ. ის ასევე, მხარს უჭერს კონფიდენციალურობის პოლიტიკის გაძლიერებას.

1714044600

საპენსიო რეფორმასთან დაკავშირებულ საკითხებზე ცვლილებათა მორიგი პაკეტი პარლამენტს უახლოეს დღეებში გადაეგზავნება.ეკონომიკის მინისტრის მოადგილე ირაკლი ნადარეიშვილის განმარტებით, ცვლილებები არსებულ მეორე სვეტის საპენსიო კანონმდებლობაში დაემატება, რომელიც გააუმჯობესებს მმართველობის სტრუქტურას, ეროვნული ბანკის მხრიდან ზედამხედველობას.  საინვესტიციო ნაწილში, ფონდს კაპიტალის ბაზარში ინვესტირების უფრო მეტი საინტერესო ინსტრუმენტი ექნება.„კაპიტალის ბაზრის განვითარებას აქვს ძალიან ხანგრძლივი და ძალიან დეტალური სამოქმედო გეგმა. ჩვენ წელს წარვადგენთ ახალ პროგრამას რომელიც დაკავშირებული იქნება წილობრივი საინვესტიციო ფონდების ხელშეწყობასთან. მთავრობამ უკვე მოიწონა და ამ დღეებში პარლამენტში გადაიგზავნება ცვლილებათა მორიგი პაკეტი საპენსიო რეფორმასთან დაკავშირებით, რომელიც, ერთი მხრივ, მნიშვნელოვნად გააუმჯობესებს საპენსიო ფონდის მმართველობისა და ზედამხედველობის სტრუქტურას და ამავე დროს, საპენსიო ფონდს მნიშვნელოვან შესაძლებლობებს გაუხსნის კაპიტალის ბაზარში ინვესტირების თვალსაზრისით. ეს ამ ინსტიტუციას გადააქცევს მთავარ მოთამაშედ საქართველოს კაპიტალის ბაზარში ძალიან სწრაფად მზარდი გრძელვადიანი ლარის რესურსით“, - აცხადებს ირაკლი ნადარეიშვილი.მისივე თქმით, ეკონომიკის სამინისტრო წელს ასევე, წარადგენს ახალ პროგრამას, რომელიც დაკავშირებული იქნება წილობრივი საინვესტიციო ფონდების ხელშეწყობასთან. მთლიანობაში, კი კაპიტალის ბაზრის რეფორმა ერთ-ერთი სტრუქტურული რეფორმაა - თუკი აქამდე ძირითადი ფოკუსი საკანონმდებლო ჩარჩოს მომზადება იყო, მეორე ფაზა სტიმულირებას და ახალ ინვესტორების გააჩენს გულისხმობს.სააგენტომ “აწარმოე საქართველოში” USAID-თან პარტნიორობით, კაპიტალის ბაზრის მხარდაჭერის პროგრამა წარადგინა. ახალი მიმართულება მიზნად ისახავს მცირე და საშუალო ბიზნესისთვის ფინანსებზე წვდომის გაუმჯობესებას და კაპიტალის ბაზრის ხელშეწყობას ფასიანი ქაღალდების სტიმულირების გზით. პროგრამის ფარგლებში, წელს სააგენტო კომპანიებს ობლიგაციების გამოშვებაში დაეხმარება. დაგეგმილია 15-მდე ბენეფიციარის მხარდაჭერა,  რომლებიც 150 მილიონამდე ლარის დამატებით საინვესტიციო რესურსს მოიზიდავენ საფონდო ბაზარზე.

1714026909

Tesla გერმანიის ქარხანაში დაახლოებით 400 სამუშაო ადგილის შემცირებას გეგმავს, რაც ქარხნის მთლიანი მუშახელის დაახლოებით 3%-ია. კომპანია ამის შესახებ განცხადებას ავრცელებს და იმედოვნებს, რომ შემცირებას სამსახურიდან იძულებითი გათავისუფლების გარეშე, ნებაყოფლობითი პროგრამის საშუალებით მიაღწევს.დაგეგმილი შემცირება ნაკლებად მძიმეა, ვიდრე ჯგუფის ადრინდელი მცდელობა გაეთავისუფლებინა 140,000-ზე მეტი თანამშრომელი, რაც მუშახელის 10%-ზე მეტია. ეს პროცესი ელექტრომობილების ფასების გაძლიერებულ ომზე მიმდინარეობს, რაც ავტომწარმოებლებს ხარჯების შემცირებას აიძულებს.„ამჟამად ელექტრომობილების შესუსტებული გაყიდვების ბაზარი ასევე გამოწვევების წინაშე აყენებს Tesla -ს. ჩვენი წარმოების რაც შეიძლება ეფექტურად მუშაობა ყოველთვის ჩვენს ინტერესებშია “, - ნათქვამია კომპანიის წერილობით განცხადებაში.გერმანიაში Tesla-ს Gruenheide-ის საწარმოში, რომელიც ევროპაში კომპანიის ერთადერთი გიგაქარხანაა, 12,000-ზე მეტი თანამშრომელია დასაქმებული.ინვესტორები ელიან, რომ ჯგუფი ბოლო 6 წელიწადში ყველაზე დაბალი მოგების ზღვარზე იქნება, რადგან ელექტრომობილებზე გლობალური მოთხოვნა იკლებს.

1713872793

„გაერთიანებული წყალმომარაგების კომპანიის“ პრივატიზება ამ ეტაპზე არ განიხილება. როგორც „ბიზნესპარტნიორს“ რეგიონული განვითარებისა და ინფრასტრუქტურის მინისტრის მოადგილე მზია გიორგობიანმა განუცხადა, სახელმწიფო გეგმავს კომპანია უფრო მეტად გააძლიეროს.„ამ ეტაპზე ვცდილობთ, რომ რაც შეიძლება მეტი ქალაქისა და სოფლისათვის იყოს ხელმისაწვდომი წყალი და ეს იქნება ეტაპობრივი - დაგეგმილია, რომ 2025 წლისთვის მთელი საქართველოს მასშტაბით ქალაქებისთვის იყოს ხელმისაწვდომობა, ხოლო 2030 წლისთვის, უკვე დასახლებების დონეზე. ამ ეტაპზე ჩვენთვის მნიშვნელოვანია, რომ ყველას ჰქონდეს სასმელი წყალი. ჩვენ ვფიქრობთ, რომ უნდა გაძლიერდეს კომპანია, როგორც მენეჯმენტის თვალსაზრისით, ასევე, დასაქმებულთა სახელფასო განაკვეთის ზრდის მიმართულებით.როდესაც ჩვენ კომპანიის გაჯანსაღებაზე ვსაუბრობთ, ასევე, მნიშვნელოვანია, რომ შესაბამისი აღჭურვილობა და ლაბორატორიები ჰქონდეს ოპერირებისთვის. ამ ეტაპისთვის განიხილება, რომ ზოგადად, მაქსიმალურად გაძლიერდეს კომპანია, იყოს მდგრადი და შესაძლებლობა ჰქონდეს მაქსიმალურად მეტი ქალაქი დაფაროს. სხვა მხრივ, ჯერჯერობით, არაფერი არ განიხილება“ - აცხადებს მზია გიორგობიანი.მისივე თქმით, კომპანია მომავალში, როგორც სახელმწიფოს 100%-იან წილობრივ საკუთრებაში არსებული საწარმო, ზოგადად, ერთიან ხედვაში მოექცევა.„წყალმომარაგების კომპანია“ რეგიონული განვითარებისა და ინფრასტრუქტურის სამინისტროს დაქვემდებარებაშია და ბიუჯეტიდან სუბსიდირდება. ის ერთ-ერთი მსხვილი სახელმწიფო კომპანიაა, რომელიც პროგრამებს და პროექტებს მთელი საქართველოს მასშტაბით ახორციელებს. კომპანია ამ დროისთვის ქვეყნის 48 ქალაქში ოპერირებს და 3 მლრდ-ის ღირებულების წყალმომარაგებისა და წყალარინების პროექტებს ახორციელებს.

1713538800

ჩინეთი გმობს ჯო ბაიდენის წინადადებას ჩინურ ფოლადზე ტარიფების გასამმაგების შესახებ. ჩინეთის საგარეო საქმეთა სამინისტროს სპიკერი ლინ ჯიანის განცხადებით, ამერიკული მხარის შენიშვნები სრულიად ეწინააღმდეგება ფაქტებს და აზიანებს ჩინეთ-ამერიკის ეკონომიკურ და სავაჭრო ურთიერთობებს.„ეს ყოველივე ძირს უთხრის ორი ქვეყნის ლიდერებს შორის სან-ფრანცისკოში შეხვედრის დროს მიღწეულ კონსენსუსს. ჩინეთი ღრმად არის შეშფოთებული და ძლიერ უკმაყოფილოა“ - თქვა ჩინეთის საგარეო საქმეთა სამინისტროს სპიკერმა.მისივე თქმით, ჩინეთი ყურადღებით დააკვირდება ამერიკული მხარის მიერ დაწყებულ გამოძიებას.„ჩინეთი მოითხოვს, რომ ამერიკული მხარე იყოს ფრთხილი სიტყვებში და ქმედებებში, შეწყვიტოს ჩინეთთან დაკავშირებული საკითხებით მანიპულირება საარჩევნო წელს, თავი შეიკავოს ეკონომიკური და სავაჭრო საკითხების პოლიტიზებისგან, გააუქმოს ჩინეთზე დაწესებული დამატებითი ტარიფები და შეწყვიტოს ახალი ტარიფების დაწესება. ჩინეთი მიიღებს ყველა საჭირო ზომას საკუთარი უფლებებისა და ინტერესების მტკიცედ დასაცავად“ - განაცხადა ლინ ჯიანმა.ამერიკის პრეზიდენტი ჯო ბაიდენი ფოლადის ბაზარზე ჩინეთის მხრიდან მომავალ საფრთხეებზე საუბრობს. ფოლადის სფეროს წარმომადგენლებთან შეხვედრისას, მან თქვა, რომ ჩინეთი ამ ბაზარზე არასამართლიანი წესებით თამაშობს, წარმოებას ასუბსიდირებს და შედეგად, სხვადასხვა ბაზრებზე პროდუქტიას დემპინგურ ფასად ყიდის.ახლა, მისი სავაჭრო წარმომადგენელი იძიებს ჩინეთის მთავრობის სავაჭრო პრაქტიკას ფოლადისა და ალუმინის ბაზარზე.„თუ ეს გამოძიება დაადასტურებს ანტიკონკურენტულ სავაჭრო პრაქტიკას, მაშინ მე მოვუწოდებ ჩემს სავაჭრო წარმომადგენელს, განიხილოს ტარიფის გასამმაგების საკითხი როგორც ფოლადის, ასევე, ალუმინის იმპორტისთვის ჩინეთიდან” - აცხადებს ბაიდენი.

1713528000

კომპანია „ფერი“ გეგმავს ენერგეტიკული პროექტები მხარდაჭერის მექანიზმის გარეშე განახორციელოს. როგორც „ბიზნესპარტნიორს“ კომპანიის აღმასრულებელმა დირექტორმა ლაშა იორდანიშვილმა განუცხადა, რამდენიმე ჰიდროელექტროსადგურის პროექტი უკვე მიმდინარე ეტაპზეა.„რაჭაში ვახორციელებთ სორგითის პროექტს, რომელიც 30 მგვტ-იანია, სვანეთში - ხუმფრერის პროექტს, რომელიც ასევე, 30 მგვტ-იანია. რამდენიმე დღეში კი, ალბათ, ახალ მემორანდუმს გავაფორმებთ სახელმწიფოსთან და ასევე, მხარდაჭერის სქემის გარეშე საკმაოდ მნიშვნელოვანი სიმძლავრის მშენებლობას დავიწყებთ. საუბარია 100 მგვტ-ზე მეტი დადგმული სიმძლავრის ჰიდროელექტროსადგურის პროექტზე“ - აცხადებს ლაშა იორდანიშვილი „ბიზნესპარტნიორთან“.ამასთან, მისივე თქმით, მხარდაჭერის მექანიზმის არსებობა ძალიან მნიშვნელოვანია, თუმცა, ამ მექანიზმს კრიტიკოსებიც ეყოლება.„საქმე ისაა, რომ ენერგეტიკა არ იანგარიშება ერთი და ორი დღით, როდესაც ამ დარგს ენდობი, ენერგეტიკა 10-15 წლიან პერსპექტივაზე უნდა გაითვალოს. ჩვენთვის, მაგალითად, ჰიდროს კუთხით ამ მექანიზმში არც მიგვიღია მონაწილეობა, რადგან, როდესაც სადგური 4-5 წლის შემდეგ შევა ექსპლუატაციაში, დარწმუნებული ვარ, რომ ის კომპანია 5 წლის შემდეგ არც კი გააგრძელებს ამ მექანიზმში მონაწილეობას - იმდენად გაზრდილი იქნება მოხმარება და იმდენად შეცვლილი იქნება რეალობა დღევანდელთან შედარებით. თუმცა, ეს მხარდაჭერის მექანიზმები ძალიან მნიშვნელოვანია დარგში დამწყები მოთამაშეებისთვის, მცირე სიმძლავრეებისთვის ან იმ სადგურებისთვის, რომლებიც კომპლექსურია, რთულია და საჭიროა საბანკო-დაფინანსებადი გახდეს ესა თუ ის პროექტი.დიდწილად, ეს მიმზიდველი არის მზისთვის, ქარისთვის. რაც შეეხება ჰიდროს, ვაპირებთ რამდენიმე პროექტი მხარდაჭერის სქემის გარეშე განვახორციელოთ და ვიყოთ მაგალითები ბაზარზე სხვა მოთამაშეებისთვის. თუმცა, ხაზგასმით ვაცხადებთ, რომ ეს ძალიან მნიშვნელოვანია მცირე სადგურებისთვის და დაეხმარება ახლად შემოსულ მოთამაშეებს, რომ თავი უფრო დაცულად იგრძნონ“ - ამბობს ლაშა იორდანიშვილი „ბიზნესპარტნიორთან“.სახელმწიფოს მიერ გამოცხადებული სიმძლავრის მეორე აუქციონი თებერვალში დასრულდა. მედიანური ტარიფები ეკონომიკის სამინისტროს ცნობით შემდეგია:ჰიდროელექტროსადგურები მოდინებაზე - 6,50 აშშ ცენტი; ქარის ელექტროსადგურები - 6,00 აშშ ცენტი; ქარის ელექტროსადგურები ბატარეებით - 8,60 აშშ ცენტი; მზის ელექტროსადგური - 5,60 აშშ ცენტი; მზის ელექტროსადგური ბატარეებით- 6,39 აშშ ცენტი; სხვა განახლებადები - 15,35 აშშ ცენტი.

1713522720

ამერიკის პრეზიდენტი ჯო ბაიდენი ფოლადის ბაზარზე ჩინეთის მხრიდან მომავალ საფრთხეებზე საუბრობს. ფოლადის სფეროს წარმომადგენლებთან შეხვედრისას, პიტსბურგში გამართულ ღონისძიებაზე მან თქვა, რომ ჩინეთი ამ ბაზარზე არასამართლიანი წესებით თამაშობს.„ამერიკა ჯერ კიდევ მუშაობს და შეუძლია კონკურენცია გაწიოს, ვიდრე სამართლიანი კონკურენცია არსებობს. მაგრამ ძალიან დიდი ხნის განმავლობაში, ჩინეთის მთავრობა სახელმწიფო ფულს ჩინურ ფოლადის კომპანიებში „ასხამს“, უბიძგებს მათ, რაც შეიძლება მეტი ფოლადი დაამზადონ. ეს პროცესი სუბსიდირებულია ჩინეთის მთავრობის მიერ და ჩინური ფოლადის კომპანიები აწარმოებენ ბევრად მეტს, ვიდრე ჩინეთს სჭირდება, ზედმეტი ფოლადს კი დემპინგის გზით, გლობალურ ბაზრებზე უსამართლოდ დაბალ ფასებში ყიდიან. ჩინეთის ფოლადის კომპანიებს არ სჭირდებათ ფიქრი მოგების მიღებაზე, რადგან, ჩინეთის მთავრობა მათ ძალიან დიდ სუბსიდირებას უწევს. ისინი ბაზრებს კი არ ეჯიბრებიან, არამედ,  ატყუებენ და ჩვენ ვნახეთ ამის ზიანი აქ, ამერიკაში”, - განაცხადა ბაიდენმა.მისივე თქმით, 2000-დან 2010 წლამდე პერიოდში, პენსილვანიასა და ოჰაიოში 14000-ზე მეტმა ფოლადის მუშაკმა დაკარგა სამსახური. ბაიდენი ამბობს, რომ ის ამას აღარ დაუშვებს - ახლა, მისი სავაჭრო წარმომადგენელი იძიებს ჩინეთის მთავრობის სავაჭრო პრაქტიკას ფოლადისა და ალუმინის ბაზარზე.„თუ ეს გამოძიება დაადასტურებს ანტიკონკურენტულ სავაჭრო პრაქტიკას, მაშინ მე მოვუწოდებ ჩემს სავაჭრო წარმომადგენელს, განიხილოს ტარიფის გასამმაგების საკითხი როგორც ფოლადის, ასევე, ალუმინის იმპორტისთვის ჩინეთიდან. ამავდროულად, ჩემს წინამორბედს და რესპუბლიკელებს სურთ ყოვლისმომცველი ტარიფები დაწესდეს ყველა ტიპის იმპორტზე ყველა ქვეყნიდან, რამაც შეიძლება ძლიერ დააზარალოს ამერიკელი მომხმარებლები. თუ ისინი ამას მოახერხებენ,ნავარაუდებია, რომ საშუალო ამერიკულ ოჯახს ეს წელიწადში საშუალოდ, $1500 დაუჯდება. ტრამპი ამას უბრალოდ ვერ ხვდება.” - აცხადებს ჯო ბაიდენი.ასევე, მან პირობა დადო, რომ ამერიკული Steel X.N "მთლიანად ამერიკულ კომპანიად" დარჩება. კომპანია US Steel Corp დათანხმდა $14,9 მილიარდად იყიდოს იაპონური Nippon Steel 5401, თუმცა, ამ საკითხზე გასულ თვეში პრეზიდენტმა ჯო ბაიდენმა წინააღმდეგობა გამოაცხადა.„პირველ რიგში, US Steel არის საკულტო ამერიკული კომპანია საუკუნეზე მეტი ხნის განმავლობაში და ის უნდა დარჩეს მთლიანად ამერიკულ კომპანიად. ამერიკულ საკუთრებად, რომელსაც მართავს ამერიკული ფოლადის კავშირი და რომელიც საუკეთესოა მსოფლიოში. და ეს მოხდება, გპირდებით“ - უთხრა ბაიდენმა მხარდამჭერებს.