დედაქალაქის მერი კახა კალაძე მიიჩნევს, რომ საქართველოში მშვიდობის შენარჩუნების შედეგია ის, რომ ქვეყანაში მსხვილი საინვესტიციო პროექტები ხორციელდება.
კახა კალაძემ, ჟურნალისტებთან Trump Tower Tbilisi -ის 70-სართულიანი ცათამბჯენის მშენებლობის საკითხთან დაკავშირებით საუბრისას, მადლობა გადაუხადა პროექტის განხორციელებით დაინტერესებულ ყველა კომპანიას.
„ზოგადად, ინვესტიციების თვალსაზრისით, ქვეყანა რომ საინტერესოა, ამაზე არაერთი გამოცემა წერს და ამაზე მეტყველებს არსებული ინტერესი, ინვესტიციები, ქვეყნის ეკონომიკური ზრდა - ყველაფერი ერთმანეთთან კავშირშია.
რა თქმა უნდა, ყველაზე მთავარი და მნიშვნელოვანი არის ის, რომ იმ პოლიტიკით, რომელსაც „ქართული ოცნება - დემოკრატიული საქართველო“ ახორციელებს, ქვეყანაში გვაქვს მშვიდობა, შესაბამისად, მშვიდობას მოაქვს ინვესტიციები, მშვიდობას მოაქვს ამ ტიპის პროექტების განხორციელება.
მადლობა ყველა იმ კომპანიას, რომელიც დაინტერესებულია ამ პროექტის განხორციელებით. ეს კიდევ ერთი დასტურია იმისა, რომ საქართველო ინვესტიციების, გადასახადების თვალსაზრისით და ყველა სხვა კომპონენტში არის საინტერესო ქვეყანა“, - განაცხადა კახა კალაძემ.
მისი თქმით, ხელისუფლება, თავისი პოლიტიკით, ყველაფერს გააკეთებს ბიზნესის ხელშესაწყობად.
„ჩვენ, ჩვენი პოლიტიკით, რა თქმა უნდა, ყველაფერს გავაკეთებთ იმისთვის, რომ ბიზნესს ხელი შევუწყოთ, ქვეყანა კიდევ უფრო განვითარდეს, ეკონომიკური წინსვლა გვქონდეს და მოსახლეობამ იგრძნოს კეთილდღეობა”, - განაცხადა დედაქალაქის მერმა და აღნიშნა, რომ პროექტის დეტალებზე განმარტებები მას შემდეგ გაკეთდება, რაც შესაბამისი წინადადება იქნება წარმოდგენილი.
რაც შეეხება მედიაში გავრცელებულ ინფორმაციას, პროექტში The Sapir Organization-ის მონაწილეობას, რომლის თავმჯდომარე და აღმასრულებელი დირექტორი, ქართული წარმომავლობის ალექს საპირია, კახა კალაძემ აღნიშნა, რომ მოხარულია, რომ ეს ოჯახი საქართველოში ინვესტიციებით შემოდის.
„ზოგადად ძალინ მიხარია. ამასთან დაკავშირებით, გუშინ ვკითხულობდი, რომ ქართული წარმოშობის ებრაელი ახალგაზრდა კაცი, რომელსაც ფესვები საქართველოში აქვს, დაინტერესებულია ინვესტიციების განხორციელებით. მან ძალიან თბილად ისაუბრა საქართველოს შესახებ. მიხარია, რომ ეს ოჯახი ინვესტიციების თვალსაზრისით შემოდის საქართველოში“, - განაცხადა კახა კალაძემ.
ცნობისთვის, ამერიკული გამოცემა The Wall Street Journal-ის მიერ გავრცელებული ინფორმაციით, The Trump Organization-ი საქართველოში ადგილობრივ პარტნიორებთან ერთად Trump Tower Tbilisi-ს პროექტს განახორციელებს. ეს იქნება 70-სართულიანი მულტიფუნქციური ცათამბჯენი, რომელიც ქვეყნის მასშტაბით ყველაზე მაღალი ნაგებობის სტატუსს დაიკავებს. Trump Tower Tbilisi მოიცავს როგორც მაღალი კლასის საცხოვრებელ რეზიდენციებს, ასევე სასტუმრო ფართებსა და კომერციულ ზონებს. ცათამბჯენის ლოკაციად თბილისის ცენტრალური პარკის მიმდებარე ტერიტორია მოიაზრება.
