logo
Loading data...
1708527300
ნათია თურნავამ თბილისში CAREC-ის სამუშაო შეხვედრაში მონაწილეობა მიიღო

საქართველოს ეროვნული ბანკის პრეზიდენტის მოვალეობის შემსრულებელმა ნათია თურნავამ მონაწილეობა მიიღო ცენტრალური აზიის რეგიონული ეკონომიკური თანამშრომლობის პროგრამის (CAREC) სამუშაო შეხვედრაში, რომლის მიზანიც CAREC-ის ქვეყნებს შორის ფინტექ სფეროში თანამშრომლობის იდეების განხილვაა.ღონისძიება მისასალმებელი სიტყვით გახსნა პირველმა ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა. სამუშაო შეხვედრას, რომელიც ორი დღის განმავლობაში გაგრძელდება, ასევე ესწრებოდნენ ცენტრალური აზიის რეგიონული ეკონომიკური თანამშრომლობის პროგრამის ქვეყნების წარმომადგენლები, აზიის განვითარების ბანკის ხელმძღვანელი პირები და სხვა, საფინანსო-საბანკო სექტორის წარმომადგენლები.როგორც ნათია თურნავამ განაცხადა, აღნიშნული ღონისძიების საქართველოში ჩატარება საქართველოსა და აზიის განვითარების ბანკს (ADB) შორის არსებული მჭიდრო პარტნიორული ურთიერთობის ნათელი დადასტურებაა და წარმოაჩენს ფინტექის მნიშვნელობას რეგიონული თანამშრომლობისთვის."საქართველომ ისტორიულად მნიშვნელოვანი როლი ითამაშა აღმოსავლეთისა და დასავლეთის დაკავშირების საქმეში; სავაჭრო ურთიერთობების მეშვეობით ჩვენი ქვეყანა ხელს უწყობდა ცოდნის გავრცელებას, კულტურული, ეკონომიკური და ტექნოლოგიური კავშირების გაღრმავებას. დღეს საქართველო კვლავაც შუა დერეფანში ვაჭრობის, ენერგეტიკის, ციფრული, სატრანსპორტო, ფინანსური და ლოგისტიკური მომსახურების ერთგვარ ღერძად გვევლინება. ამ ფუნქციის შესანარჩუნებლად საქართველო მუშაობს საგადახდო ინფრასტრუქტურის, მარეგულირებელი ჩარჩოს და საბანკო კანონმდებლობის ევროკავშირის სისტემებთან შესაბამისობაზე. ამავდროულად, ვაგრძელებთ ფინტექ სექტორის მუდმივ გაძლიერებას და ფინანსურ სფეროში რეგიონალური თანამშრომლობის შესაძლებლობების შესწავლას, რითაც მტკიცედ მივყვებით CAREC-ის პროგრამის ამოცანების შესრულების გზას", - აღნიშნა ნათია თურნავამ სიტყვით გამოსვლისას.სებ-ის პრეზიდენტის მოვალეობის შემსრულებლის თქმით, CAREC-ის ქვეყნებში ფინტექის განვითარება საყოველთაო სიკეთის მომტანია და მისი ხელშეწყობა საერთო ამოცანაა."ფინტექ სფეროს მარეგულირებლებსა და დაინტერესებულ მხარეებს შორის თანამშრომლობამ და ფინანსური სისტემების გაძლიერებულმა ინტეგრაციამ შეიძლება მნიშვნელოვნად შეუწყოს ხელი რეგიონალური საგადახდო და საანგარიშსწორებო სისტემების ურთიერთდაკავშირებას, რაც შემდგომში დიდად დაეხმარება ვაჭრობას და გლობალურ ფინანსურ მთლიანობას", - განაცხადა სებ-ის პრეზიდენტის მოვალეობის შემსრულებელმა.ნათია თურნავას განმარტებითვე, ბოლო წლებში საქართველოს ეროვნულმა ბანკმა თვალსაჩინო ნაბიჯები გადადგა და რეგიონში მოწინავე ტექნოლოგიებისა და ძლიერი ფინანსური სისტემის მქონე  წამყვან ინსტიტუტად იქცა.

1708423020

"ბახმაროში "ორბის" კომპლექსის განხორციელება გაანადგურებს კურორტის ავთენტურობას" - ურბანული განვითარების ინსტიტუტი

ბახმაროში ,,ორბის“ მრავალფუნქციური პროექტის მშენებლობა აქტუალობას არ კარგავს. სპეციალისტების ნაწილი აცხადებს, რომ  ქვეყნის   ერთ-ერთ წამყვან კურორტზე მასშტაბური  მშენებლობა, რეალურად დაუშვებელია.როგორც ურაბანული განვითარების ინსტიტუტის დამფუძნებელი ანი ბიბილაშვილი "ბიზნესპარტნიორთან" განმარტავს, გარდა იმისა, რომ ბახმაროს იერსახე მახინჯდება და ვიზუალურად განსხვავებული ტიპის კონცეფციად გარდაიქმნება, პროექტი მიუღებელია თანმხლები რისკების გამოც, რასაც  უსაქართველოს ურბანული განვითარების ინსტიტუტი მასალებზე დაყრდნობით ასაბუთებს.ანი ბიბილაშვილის ინფორმაციით, შემუშავებულ გენ.გეგმაში არის გარკვეული შეცდომები, რაც აუცილებლად უნდა გადაიხედოს და მასში კორექტირება შევიდეს. მისი ინფორმაციით, იმ სახით, როგორითაც ,,ორბი“ ბახმაროში სასტუმროს აშენებს, კურორტისთვის საშიში ტენდენციის დასაწყისად შეიძლება ჩაითვალოს. ბიბილაშვილი მშენებელ კომპანიას, ასევე მთავრობას, საკუთარ რეკომენდაციას სთავაზობს, რაც მისი თქმით, ოპტიმალური ვარიანტია."ბახმაროში პროექტის ამ ფორმით განხორციელება, კურორტს ავთენტურობას დაუკარგავს. არგუმენტი, რომ გენ.გეგმის ფარგლებშია პროექტი და ამიტომ სწორია,  ნამდვილად მიუღებელია. გაცილებით მსხვილი დადგენილებები არსებობს მსოფლიო მასშტაბით, დღეს მსოფლიო გლობალურად უმკლავდება კლიმატის ცვლილებას და ყველამ კარგად იცის, დასახლებების გამჭიდროება რა პრობლემებს გამოიწვევს. ამიტომაც არსებობს გაეროს მდგრადი განვითარების მიზნები, რომელსაც  საქართველოც უერთდება და ეს პროექტი თავისი არსით, ამ მიზნებს  ნამდვილად ეწინააღმდეგება ანუ მეთერთმეტე მიზანი, რაც არის მდგრადი ქალაქები და დასახლებები, ,,ორბის’’ პროექტში ვერც ერთ მოცემულ  პუნქტს ვერ  აკმაყოფილებს“, - აცხადებს ანი ბიბილაშვილი.ურბანული განვითარების ინსტიტუტის დამფუძნებელს ამომწურავი პასუხი აქვს იმაზეც, რას ვიღებთ პროექტის განხორციელებით და რა რისკებს მოიცავს მრავალფუნქციური კომპლექსის განხორციელება ბახმაროსთვის, რომელიც კოტეჯური ტიპის დასახლებაა და წარმოდგენილ გეგმასთან წინააღმდეგობაშია.,,სამშენებლო კომპანიის მიერ წარმოდგენილი პროექტი გენ.გეგმაში ნამდვილად ჯდება თეორიული არსით, ამტკიცებს იმას, რომ გენგეგმამ თავის დროს შეცდომა დაუშვა, როცა ასცდა  გაეროს მდგრადი განვითარების მიზნებს, ევროპის საუკეთესო გამოცდილებას. პროექტის მომხრეების არგუმენტია, რომ შვეიცარიის ქალაქებშიც შენდება მასშტაბური სასტუმროები, რაც არასწორი შედარებაა. ბახმარო მცირე ზომის დასახლებაა და დიდ ქალაქთან მისი მსგავსება აბსურდია. თუმცა შვეიცარიას  აქვს ძალიან კარგი მაგალითები, როგორც უნდა განვითარდეს ანალოგიური ტურისტული მიმართულება, შედარებისთვის, ბერნი რომ ავიღოთ,  იგი ინარჩუნებს ერთსაუკუნოვან ხის კოტეჯებს და ამ დასახლების იერსახე ხელუხლებელია. კურორტს  სამეფო ოჯახის წევრები და ცნობილი ადამიანები სტუმრობენ. ძალიან საინტერესო ადგილია მსოფლიო ტურიზმისთვის, ამიტომაც ეს პრაქტიკა ჩვენც უნდა გავითვალისწინოთ.  ცხადია, ბახმარო უნდა აშენდეს და განვითარდეს, მაგრამ იმ მასშტაბით და ფორმით, რაც ავთენტურობას შეუნარჩუნებს და რამდენიმე წლის შემდეგ გაცილებით დიდ შემოსავალი მოიტანს“, - განმარტავს ანი ბიბილაშვილი.ურბანული განვითარების ინსტიტუტის ხელმძღვანელს აქვს პასუხი კითხვაზე, როგორ უნდა  განვითარდეს ბახმარო და რა შეიძლება გააკეთოს ინვესტორმა (კონკრეტულ შემთხვევაში - ,,ორბიმ’’), რომ საფრთხეები მინიმუმამდე შემცირდეს.ერთ-ერთი მნიშვნელოვანი გარემოება - გარემოს ზემოქმედების შეფასების ანგარიში, რომლის  არარსებობა გარემოს დაცვისა და სოფლის მეურნეობის მინისტრის მოადგილე ნინო თანდილაშვილმაც დაადასტურა, ბიბილაშვილის მხრიდან გარკვეულ კრიტიკას იწვევს. მისი შეფასებით, ეს არის "შავი ხვრელი" კანონში, რითაც კონკრეტულ შემთხვევაში ,,ორბი ჯგუფმა“ ისარგებლა. თუმცა, როგორც ბიბილაშვილი განმარტავს, ამით სამშენებლო კომპანია სახელმწიფოს წინააღმდეგ არ მიდის.როგორც ცნობილია, გარემოს დაცვისა და სოფლის მეურნეობის მინისტრის მოადგილემ ნინო თანდილაშვილმა მედიასთან განაცხადა, რომ არანაირი კონკრეტული ნებართვა ამ დროისთვის გაცემული არ არის. მინისტრის მოადგილე ამბობს, რომ კონკრეტული საცხოვრებელი არეალის განაშენიანებასთან დაკავშირებით ნამდვილად იყო შესული განაცხადი, თუმცა გარემოს დაცვის სააგენტოს მხრიდან კომპანიას დამატებით დეტალებთან დაკავშირებით კორესპონდენცია გაეგზავნა.ურბანული განვითარების ინსტიტუტის დამფუძნებელი აცხადებს, რომ ორგანიზაცია აღნიშნული პროექტის ამ ფორმით  განხორციელებაში  ძალიან დიდ რისკს ხედავს."დღეს თუ დავუშვებთ  ამ მშენებლობას, დომინოს პრინციპით განავითარებს  კიდევ სხვა მსგავსი მასშტაბის მშენებლობებს. იმ სახით,  რა სახითაც ვიცით დღეს ბახმარო, უკვე მომავალში იქცევა  რამე სხვა დასახლებად, რომელსაც შეიძლება  სახელწოდება დარჩეს ბახმაროსი, მაგრამ მისი იერსახე, განწყობა, ჰაერი, სამკურნალო თვისებები  - ეს ყველაფერი გაქრება. ამასთან, გამოიწვევს სერიოზულ ეკოლოგიურ პროცესს კლიმატის ცვლილებასთან მიმართებაში გარემოზე ცუდი ზემოქმედების გამო. იმ ფორმით და მასშტაბით, როგორიც დღეს ბახმაროა, მომავალში ფიზიკურად ვერ იარსებებს.აღნიშნულთან დაკავშირებით ჩვენი ორგანიზაცია გაეცნო გარკვეულ დოკუმენტაციას, რომელიც ეკონომიკის სამინისტროსგან გამოვითხოვეთ. ჯერჯერობით არსად შეგვხვედრია სრულ დოკუმენტაციაში გარემოზე ზემოქმედების შეფასების (გზშ) ანგარიში. წესით, ამ მასშტაბის ჩარევა როცა ხდება გარემოზე, შესაბამისი დოკუმენტი უნდა მომზადდეს, მიუხედავად იმისა, რომ კანონში შეიძლება ამის ვალდებულება არ იყოს ჩადებული. შესაბამისად, ჩვენ მოვითხოვეთ გზშ-ს მომზადება, ვასაბუთებთ კიდეც ამის საჭიროებას. იმის გამო, რომ კანონში ყველა ვალდებულება არ იქნება ჩადებული სამშენებლო ნებართვის მიმართ, ლოგიკურია კითხვის ნიშნის ქვეშ დადგეს კონკრეტული  საკითხი. შესაბამისად,  მოთხოვნილ იქნეს დამატებითი კვლევები.  ყველა თეორიული და პრაქტიკული ანალიზის საფუძველზე უნდა მოეთხოვათ გზშ, თუმცა კანონში ეს ვალდებულება არ არის. გენ.გეგმაში კიდევ მეტი ისეთი ნიუანსია ჩადებული, რომელიც განგრძობითად მოახერხებს, რომ კიდევ რამდენიმე ჰექტარი ანალოგიური ინტენსივობით განაშენიანდეს და კურორტის ავტენტურობა დაიკარგოს, სრულად გაანადგუროს ბახმაროს იერსახე. ჩვენი რეკომენდაციაა ასევე, რომ  პროექტი დააბრუნონ ქალაქ-დაგეგმარებით  ანუ განაშენიანების დეტალური გეგმის ეტაპზე , რომელმაც დაუშვა ასეთი მასშტაბის და მოცულობის პროექტირება. სახელმწიფომ მოინდომოს და  შესთავაზოს მშენებელს, რომს კომპლექსი დაიყოს მოცულობებად, რათა ბახმაროს განვითარების გეგმაში ჩაჯდეს“, - აცხადებს ანი ბიბილაშვილი.რაც შეეხება კონკრეტულ საფრთხეს ეკოლოგიის კუთხით, მისივე ინფორმაციით,  პროექტის შედეგად, პრობლემას შექმნის ტერიტორიის შესაბამისი კომუნიკაციით აღჭურვა, მათ შორის, კურორტზე არსებული გათბობა-გაგრილებისა და  წყლის სისტემების რაოდენობა, ჩამდინარე წყლების ფილტრაციის საკითხი და სხვა. "ჩვენი ორგანიზაცია ეკოლოგიის მიმართულებით არ ორიენტირდება, ,,გენერალურმა გეგმამ დაუშვა ბახმაროს  არასწორი განვითარება, ამიტომ ეკონომიკის სამინისტროს აქვს უფლება მოითხოვოს გენ.გეგმის რევიზია, მოხდეს გადახედვა და საჭიროების შემთხვევაში ცვლილება. დღეს გვაქვს ფაქტი სახეზე, რომ პროექტი, რომელიც პირდაპირ ჯდება გენგეგმაში, შეუსაბამოა მდგრად განვითარებასთან, ე.ი. გენ.გეგმა უშვებს ამ ტიპის შეცდომას როგორც ამ პროექტში ვხედავთ - მასშტაბური ტიპის მშენებლობას, გარკვეული ტიპის მასშტაბს, რომელიც მდგრად განვითარებასთან შეუსაბამოა. ამიტომაც კანონში  გარკვეული ცვლილებაა შესატანი, რომ მომავალში  მსგავსი პროცესები დააზღვიოს, მეორეც, გენგეგმის ცვლილების გარეშეც არის შესაძლებელი, რომ მიიღოს  გადაწყვეტილება ეკონომიკის სამინისტრომ ანუ ნებართვის გამცემმა ორგანომ და მოითხოვოს  ამ ტერიტორიისთვის პროექტის მორგება“, - აცხადებს ანი ალიბეგაშვილი.ცნობისთვის, კომპანია „ორბი ჯგუფმი“ ბახმაროში, მრავალფუნქციურ სასტუმროს აშენებს. პროექტის პრეზენტაცია უკვე შედგა.სასტუმროს მშენებლობა და გაყიდვები ფაქტობრივად საზოგადოების ნაწილის პროტესტის ფონზე მიმდინარეობს. პროექტის მოწინააღმდეგეების არგუმენტით, მასშტაბური სასტუმროს მშენებლობით ბახმაროს ავთენტური იერსახე დროთა განმავლობაში  დაიკარგება და კოტეჯურ დასახლებას ბეტონის კონსტრუქციები ჩაანაცვლებს.

1708351200

Georgian Products-ის წარმოებული შინაური ცხოველების ავეჯი, ქართულ ბაზარზე გაზაფხულიდან გაიყიდება

შინაური ცხოველთა ავეჯის და სნეკის მწარმოებელი კომპანია Georgian Products ადგილობრივ  ბაზარზე გაყიდვებს იწყებს. როგორც კომპანიის  დამფუძნებელმა, დავით ბარდაველიძემ ‘’ბიზნესპარტნიორთან“ განაცხადა, ქართულ ბაზარს შინაური ცხოველების ავეჯის, საკვებისა და თავის მოვლის საშუალებების დიდ ასორტიმენტს შესთავაზებს.მისივე ინფორმაციით, პროდუქციის რეალიზაცია ინტერნეტ პორტალის საშუალებით მოხდება.‘’გლობალურ ბაზრებზე 2015 წლიდან გავდივართ. ამ ეტაპზე გადავწყვიტეთ, რომ პროდუქცია ქართველ მომხმარებელსაც შევთავაზოთ, თუმცა პარალელურად ექსპორტის მიმართულებას გავაძლიერებთ. ადგილობრივი მომხმარებელი ჩვენს პროდუქციას კარგად იცნობს, თუმცა აქამდე ექსპორტზე ვიყავით ორიენტირებულები. გლობალური ბაზრების პარალელურად, უკვე ქართული ბაზრისთვისაც შევქმნით პროდუქციას. ეს იქნება შინაური ცხოველების ავეჯი, აქსესუარები, ასევე საკვები და თავის მოვლის საშუალებები, რაზეც დიდი მოთხოვნაა. ამისთვის იქმნება  ინტერნეტპორტალი და ჩვენ თვითონ გავალთ მომხმარებლამდე.  სამზადისი დაწყებული, ვემზადებით და ონლაინ გაყიდვებს გაზაფხულზე დავიწყებთ“, - აცხადებს დავით ბარდაველიძე.მისი ინფორმაციით, ქართველ მომხმარებელს შესთავაზებენ სრულ ასორტიმენტს როგორც საკუთარი წარმოებიდან, ასევე გერმანულ ბრენდებს, რაზეც გერმანელ პარტნიორებთან შეთანხმება მიღწეულია.პროექტის საინვესტიციო ღირებულება $ 800 000 -ს შეადგენს.ცნობისთვის, ცხოველების ავეჯის საწარმო Georgian Products-ი 2014 წელს ამოქმედდა. ჯერჯერობით პროდუქციის რეალიზაცია სრულად ექსპორტზე ხდება. კომპანია აშშ-სა და ევროპის ბაზრებზე ოპერირებს და  დღეისთვის მისი წლიური წარმადობა 1 მლნ ერთეული ავეჯია.Georgian Products-ი  550 ადამიანს ასაქმებს.

1708317000

კომერციულ ფართებზე ყველაზე დიდი მოთხოვნა ქსელური მარკეტებისა და ფარმაცევტული კომპანიების მხრიდანაა -  Noble Real Estate

კომერციულ ფართებზე ყველაზე დიდი მოთხოვნა სუპერმარკეტებისა და ფარმაცევტული კომპანიების მხრიდან ფიქსირდება. როგორც  უძრავი ქონების კომპანია Noble Real Estate-ის დამფუძნებელი ვაჟა მებაღიშვილი ‘’ბიზნესპარტნიორთან“ აცხადებს, მსგავსი ტენდენცია ბაზარზე წლების განმავლობაში გრძელდება და ამ თვალსაზრისით, მდგომარეობა არც უახლოეს წლებში შეიცვლება.‘’კომერციულ ფართებზე მოთხოვნა ძირითადად ერთსა და იგივე კომპანიების მხრიდანაა, როგორიცაა ფარმაცევტული ბიზნესი და ქსელური მარკეტები. ეს მოცემულობა იყო წლების წინ  და ტენდენცია გრძელდება. შესაბამისად, ორივე სეგმენტში მაღალი კონკურენციაა, რომლის მასშტაბიც უფრო მეტად იზრდება. კერძოდ, კონკურენციაა იმ მხრივ, რომ  კარგ, ბიზნესისთვის მისაღებ ლოკაციებზე შესაფერისი კომერციული ფართის მოძებნა რთულია. აუცილებლად ეს უნდა იყოს ხალხმრავალ ადგილებში, ხოლო ფართი სიდიდითაც გამოირჩეოდეს. როგორც წესი, დიდი მოცულობითი ფართები სჭირდებათ დამქირავებლებს, რომ განათავსონ პროდუქცია. გაიზარდა  მათი ასორტიმენტი და ამიტომ ამ ობიექტების  პატარა  ფართებში განთავსება რთულია“, - აცხადებს ვაჟა მებაღიშვილი.რაც შეეხება ფასს, მისი თქმით, კონკრეტული მაჩვენებლის გამოთვლა ძნელია, ვინაიდან სხვადასხვა ფაქტორზეა დამოკიდებული და ხშირ შემთხვევაში ინდივიდუალურია.,,ფასები დიდწილად დამოკიდებულია ლოკაციაზე, რამდენად მოთხოვნადი და საინტერესოა კონკრეტული ობიექტისთვის. შეიძლება მომიჯნავე ობიექტები იყოს და განსხვავებული ღირდეს. ტარიფის ერთ-ერთი განმსაზღვრელი პირობაა, რამდენად აქტიურია ქუჩა. არის შემთხვევები, როცა პარკირების სირთულის გამო რომელიმე კომპანიისთვის ადგილი მიუღებელია, მაგრამ საიმიჯოდ კარგად გამოიყურება.  შესაბამისად, ასეთი ობიექტი ძვირად ფასობს.  მთლიანობაში, ბევრი ფაქტორია, რომელიც განსაზღვრავს ფასს, ამიტომ ვერ დავკონკრეტდები. დამქირავებელი კი ყოველთვის უპირატესობას ანიჭებს გამოცდილ ბრენდებს, რომლებმაც დროს გაუძლეს, სტაბილურად არიან და მათ მიმართ მაღალია სანდოობა. შესაბამისად, ახალ კომპანიებს, რომლებიც შემოდიან ბაზარზე, როგორი დიდიც არ უნდა იყოს მათი კაპიტალი, უძრავი ქონების ბაზარზე მაინც ეჭვით უყურებენ, რის გამოც მათ საკმაოდ უჭირთ შესაბამისი ფართების მოძიება და ბიზნესის განვითარება“, - განმარტავს ვაჟა მებაღიშვილი ‘’ბიზნესპარტნიორთან“.

1708171200

KABA  აშშ-ის ბაზარზე გასასვლელად ემზადება

KABA გლობალურ ბაზრებზე გასასვლელად ემზადება. როგორც კომპანიის გენერალური დირექტორი კოკი გახარია ‘’ბიზნესპარტნიორთან“ აცხადებს, საერთაშორისო ბაზარზე KABA ადრეც იყო წარმოდგენილი, თუმცა ძირითადად მცირე კოლექციებით, ამდენად, ბრენდისთვის ეს ფაქტობრივად პირველი მცდელობაა მასშტაბური ექსპორტისთვის, რაზეც პარტნიორთან მოლაპარაკების პროცესს გადის.ჯერჯერობით უცნობია, წარმოების რა წილი გავა ექსპორტზე, როგორც კოკი გახარია აღნიშნავს, ეს მაჩვენებელი შეიძლება დაახლოებით 30% იყოს.მისივე ინფორმაციით, ექსპორტის საფუძველი ამ ეტაპზე საფრანგეთის დედაქალაქში მოდის საერთაშორისო გამოფენა Who’s Next-ში მონაწილეობა გახდა. ,,გლობალური ბაზრების ასათვისებლად საერთაშორისო  გამოფენები დიდ შესაძლებლობას იძლევა. პარიზის ღონისძიებაზე „აწარმოე საქართველოში“ ორგანიზებით და  GAFA-ს (საქართველოს ტანსაცმლისა და მოდის ასოციაცია) მხარდაჭერით აღმოვჩნდით. გამოფენაზე დიდი  ინტერესები გამოიჩინეს უცხოელმა  ბაიერებმა, შეკვეთა ოფიციალურად ავიღეთ. პარალელურად, კიდევ 5 ბაიერთან ვაწარმოებთ მოლაპარაკებას.  გადაწყვეტილება  თითქმის მიღებულია და გავალთ  აშშ-ში. ასევე განვიხილავთ დუბაის და რამდენიმე ისეთ ქვეყანას, საიდანაც  KABA-ს მიმართ ინტერესი გამოიხატა. საუბარია  როგორც გაზაფხული-ზაფხულის, ასევე შემოდგომა-ზამთრის სამომავლო კოლექციებზე.  ამერიკელ პარტნიორთან მოლაპარაკების პროცესს გავდივართ, დეტალები გარკვეულია, ველოდებით კონკრეტული მოდელების შერჩევას და მერე უკვე მიწოდებას მოვახდენთ, გარდა ამისა 2024 წელს ძალიან მნიშვნელოვანი სიახლით შევხვდით, გავხსენით ახალი საწარმო და გავზარდეთ როგორც ადამიანური რესურსი ასევე წარმოებაც და გვაქვს მზადყოფნა ახალი გამოწვევებისთვის“, - განმარტავს კოკი გახარია.როგორც KABA-ს გენერალური დირექტორი აღნიშნავს, ბიზნესისთვის გარკვეულ გამოწვევას პროფესიული კადრის სიმცირე წარმიადგენს. რაც შეეხება სეგმენტს, მომხმარებლების უმეტესობა ადგილობრივია, 10%-ს კი  უცხოელი ტურისტები შეადგენენ.მისივე ინფორმაციით, მოთხოვნა მზარდია, რაც 2023 წლის შედეგმაც აჩვენა. კერძოდ, რეალიზაციის მაჩვენებლები  2022 წელთან შედარებით, 30%-ით გაიზარდა.ცნობისთვის, KABA ქართულ ბაზარზე წარმოდგენილია სამი მაღაზიით:  პეკინზე, ‘’გალერია თბილისში“(რამდენიმე დიზაინერთან ერთად) და  ბათუმი მოლში.გარდა ამისა, ბრენდი ფლობს საწარმოს, რომელიც თბილისში, აკაკი ბაქრაძის 15 ნომერში  მდებარეობს.

1708156800

ავტომობილის მოვლის სერვისებზე მოთხოვნა გაიზარდა - "საშხაპე"

ავტოსამრეცხაო "საშხაპე"-ს მენეჯმენტი "ბიზნესპარტნიორთან" ბაზარზე არსებულ ტენდენციებზე საუბრობს. კომპანია  მომხმარებელს სხვადასხვა სახის მომსახურებას სთავაზობს, მათ შორის იმას, რაც  ავტომობილის მოვლისთვის არის აუცილებელი (ქიმწმენდა, ტექინსპექტირების ცენტრი და კაფე ევროპული სამზარეულოთი)კომპანიაში განმარტავენ, რომ ავტო სამრეცხაოების რაოდენობა ქართულ ბაზარზე საკმაოდ დიდია, თუმცა მაღალ სეგმენტში მომუშავე კომპანიები ძალიან მცირეა, შესაბამისად, ამ მიმართულებით კონკურენცია გამოკვეთილი არ არის.  "სამრეცხაოში გვაქვს სხვადასხვა სერვისი, რის მიღებაც მსგავსი ტიპის დაწესებულებაში შესაძლებელია: სტანდარტული  რეცხვა, ქიმწმენდა, ვიაიპი რეცხვა, პოლირება, ავტომობილის პოლირება, მომსახურება ,,კერამიკა“ და  სხვა. მაღალი მოთხოვნის გამო სამიოდე თვის წინ მეორე ფილიალი დავამატეთ. წლიურ ჭრილში, 2023 წელს, წინა 2022 წლისგან განსხვავებით, 30%-ით გაიზარდა მოთხოვნა. არ გამოვრიცხავთ, სამომავლოდ ფილიალების რაოდენობა გავზარდოთ, თუმცა ეს გრძელვადიან გეგმაშია და უახლოეს პერიოდში ამ საკითხს არ განვიხილავთ.რაც შეეხება კონკურენციას, ჩვენ ვმუშაობთ მაღალ სეგმენტზე, სადაც  ვერავის მოვიაზრებთ კონკურენტად. შეგვიძლია ვთქვათ, რომ ამ მიმართულებით კონკურენცია ჯერჯერობით სუსტია“, - აცხადებენ კომპანიაში.ცნობისთვის, ,,საშხაპე“ 2012 წელს შეიქმნა. ამ ეტაპზე იგი თბილისში ორი ფილიალით არის წარმოდგენილი უნივერსიტეტის ქუჩაზე და წერეთლის გამზირზე.

1708095600

"ჯავშნების 90% უცხოელი ვიზიტორებია, თანდათან იზრდება ადგილობრივი ტურისტების წილიც" – Home Inn

ლაგოდეხში მდებარე საოჯახო სასტუმრო Home Inn ძირითადად იმ უცხოელ ვიზიტორებს მასპინძლობს, ვისაც ეკოლოგიურად სუფთა გარემო და ავთენტური სამზარეულო იზიდავს. სასტუმროს თანადამფუძნებელი ლელა კიკალეიშვილი ‘’ბიზნესპარტნიორთან“ აცხადებს, რომ დამსვენებლების 90% უცხოელი ვიზიტორები არიან.პანდემიურ პერიოდში შექმნილი საოჯახო სასტუმროს შექმნის მიზანია, მაქსიმალურად აითვისონ აგროტურისტული პოტენციალი, რის შესაძლებლობასაც ლაგოდეხის ბუნება და ინფრასტრუქტურა იძლევა."ორი წლის წინ, როცა საქმიანობას ვიწყებდით, აქცენტი გავაკეთეთ უცხო ქვეყნების მოქალაქეებზე, რომლებიც პრიორიტეტს ოჯახურ პირობებში, მყუდრო გარემოში დასვენებას ანიჭებენ. პირველივე წელს მოვიზიდეთ ვიზიტორები, ხოლო უკვე 2023 წელს, მოვახერხეთ, რომ დამსვენებლები ყველა სეზონზე მიგვეღო. ამან შემოსავლებში 30-40%-იანი ზრდა გამოიწვია, რაც დიდი სტიმულია ბიზნესის გაფართოებისა და განვითარებისთვის. ჯავშნების 90 % Booking-დან  შემოდის და უცხოელი ტურისტები არიან, თუმცა ქართველი ვიზიტორებიც გვემატება. ძირითადად არიან  ჯგუფები - კომპანიები და  ოჯახები. გასული წლის სტატისტიკა რომ ავიღოთ, ბევრი ტურისტი იყო გერმანიიდან, ჰოლანდიიდან,ინგლისიდან, მათ შორის გვსტუმრობდნენ აზიური ქვეყნებიდანაც. ძირითადად მაინც ბუნების, მთის და ლაშქრობების მოყვარული საზოგადოებაა. ტენდენციაც გამოკვეთილია, ზოგადად აგროტურისტული მიმართულება არის გააქტიურებული, ამის საჭიროება თავის დროზე პანდემიამაც დაგვანახა. ადამიანები მსოფლიოს სხვადასხვა კუთხიდან დიდ ყურადღებას უთმობენ სუფთა გარემოში დასვენებას და  ნატურალურ სურსათს, რასაც საოჯახო სასტუმროები ვთავაზობთ, ინტერესიც ამით აიხსნება“, - აცხადებს ლელა კიკალეიშვილი.Home Inn-ის თანადამფუძნებელი თვლის, რომ ტურისტულ ბიზნესში ინვესტიცია მომგებიანია, ამიტომ შემდეგ წლებში ობიექტის განვითარებას გეგმავს."დეტალებს, რა შეიძლება გავაკეთოთ და როგორ სერვისს შევთავაზებთ სტუმრებს, ამაზე ჯერ კიდევ ვმუშაობთ.  ორი წლის დაკვირვებამ გვიჩვენა ის საჭიროებები,რაც  ბიზნესის კიდევ უფრო მეტი  წარმატებისთვის უნდა გავითვალისწინოთ.  ეს ეხება როგორც ინფრასტრუქტურულ ნაწილს, ასევე კულინარიულ მიმართულებას. გვინდა გავაფართოოთ საკუთარი პროდუქტის წარმოება და სხვა. ვგეგმავთ ტრადიციული სტუმარ-მასპინძლობის სრული სერვისი შეთავაზებას, რომელიც ჩვენს ქართულ ტრადიციას  გამოხატავს. ძალიან გვეხმარება ადგილმდებარეობა - ლაგოდეხის დაცულ ტერიტორიებთან სიახლოვე,რომელსაც ასეულობით უცხოელი სტუმრობს. რაც შეეხება კვების ნაწილს, მრავალფეროვანი, ტრადიციული კერძები დიდ მოწონებას იმსახურებს ტურისტების მხრიდან და ამას განსაკუთრებით აღნიშნავენ. ვგეგმავთ მენიუში დავამატოთ მეტ-ნაკლებად საქართველოს ყველა კუთხის სამზარეულო და უფრო საინტერესო გავხადოთ“, - აცხადებს ლელა კიკალეიშვილი.ცნობისთვის, საოჯახო სასტუმრო Home Inn ლაგოდეხში 2021 წელს დაფუძნდა. სასტუმროს და ტურისტების მასპინძლობას  მართვას ოჯახის წევრები უწევენ .რაც შეეხება განხორციელებულ ინვესტიციას, როგორც საოჯახო სასტუმროს დამფუძნებლები აცხადებენ, თავის დროზე მინიმალური ხარჯი გასწიეს, რის შესაძლებლობაც ბებია-ბაბუის დანატოვარმა სახლმა მისცა.  ეზოს კეთილმოწყობა და მცირე სარეაბილიტაციო სამუშაოები ტურისტებიდან  შემოსული თანხით მოახდინეს.ტურისტული ობიექტის გაფართოებისთვის სავარაუდო ინვესტიცია 60-70 ათასი ლარია, რის მოზიდვასაც  Home Inn-ის დამფუძნებლები მომავალში სხვადასხვა დონორი ორგანიზაციებიდან გეგმავენ.

1708005600

"მომხმარებლების 70%-მდე უცხოელი ტურისტია" -  რესტორანი "ოცი ნაბიჯი თავისუფლებამდე"

თბილისის ძველ უბანში, კოტე აფხაზის ქუჩაზე მდებარე რესტორნის ‘’ოცი ნაბიჯი თავისუფლებამდე“ ხელმძღვანელი ტურისტების სიმცირეზე  საუბრობს.  კოტე გაბრიჩიძე ‘’ბიზნესპარტნიორთან“ აღნიშნავს, რომ პანდემიის შემდგომ პერიოდში განსაკუთრებით მაღალმხარჯველი ტურისტების რაოდენობა საგრძნობლად შემცირდა, თუმცა რესტორნის ნიშა უცვლელია.გაბრიჩიძის განცხადებით,  "ოცი ნაბიჯი თავისუფლებამდე" განსხვავებული კონცეფციის რესტორანია, რომელიც ძირითადად უცხოელ ტურისტებზეა გათვლილი, მიუხედავად ამისა, პრიორიტეტს   ადგილობრივი მოქალაქეები წარმოადგენენ. ‘’ჩვენი რესტორნის მდებარეობიდან გამომდინარე, გათვლა ძირითადად უცხოელ ტურისტებზე, თუმცა ყველა კატეგორიის მომხმარებელი ჩვენთვის ძალიან მნიშვნელოვანია.  რესტორნის მიმართულება ღვინო და ღვინით შექმნილი კერძებია, რის დიდი არჩევანიცაა. ეს კონცეფცია გამოგვარჩევს სხვებისგან ანუ კერძებშიც აქცენტს ღვინოზე ვაკეთებთ. ჩვენ მაინც ბიუჯეტურ სტუმრებზე გვაქვს ორიენტაცია. მომხმარებლების 70%-მდე უცხოელი ტურისტია, თუმცა ნაკლებად მხარჯველთა კატეგორია. შეიძლება ითქვას, რომ მაღალმხარჯველი  ტურისტების დიდი დეფიციტია.  შეიძლება 5-ვარსკვლავიან სასტუმროებში ეს არ იგრძნობა. თუ  პანდემიამდელ მაჩვენებელს შევადარებთ,  ქალაქის ცენტრში  უცხოელი ტურისტების რაოდენობა მცირეა. ვერ გეტყვით, რა შეიძლება იყოს ამის მიზეზი, ვიზიტორებში ამის გამოკითხვა არ ჩაგვიტარებია. ალბათ ის გარემოება, რომ კორონავირუსი იყო, რასაც შემდგომი პერიოდის სირთულეები დაემატა.  ეტყობა, მდიდარი და ელიტარული ტურისტი საქართველოში არ ჩამოდის“, - აცხადებს კოტე გაბრიჩიძე.რესტორნის ხელმძღვანელი "ბიზნესპარტნიორთან“ ასევე აღნიშნავს, რომ სამომავლოდ აქტიური კამპანიის ჩატარებას გეგმავს. კერძოდ, ჩატარდება მასტერკლასები, დეგუსტაციები და სხვადასხვა ტიპის აქტივობები, რაც ტურისტებს მოიზიდავს - როგორც უცხოელებს, ასევე ადგილობრივებსაც. მიმდინარე პერიოდის ერთ-ერთ გამოწვევად კი კოტე გაბრიჩიძე კადრების სიმცირეს ასახელებს.ცნობისთვის, თბილისის ცენტრალურ უბანში, თავისუფლებიდან ოც ნაბიჯზე მდებარე რესტორანი ,,ოცი ნაბიჯი თავისუფლებამდე“ 2022 წელს დაფუძნდა.

1708000620

"კლინიკის პაციენტებიდან ტურისტების წილი 5%-ია და ისიც ქართველი ემიგრანტების ხარჯზე" - გია გვარამია

პლასტიკური ქირურგი, “გია გვარამიას ესთეტიკური მედიცინის ცენტრის“ დამფუძნებელი გია გვარამია "ბიზნესპარტნიორთან“ აცხადებს, რომ პლასტიკურ ქირურგიაში სხვა ქვეყნებიდან ჩამოსული პაციენტების  წილი 5%-ს არ აღემატება.მისი თქმით, ამის მიზეზი პლასტიკური ოპერაციების სპეციფიკაა, რაც რეაბილიტაციის პროცესთან არის დაკავშირებული და მოითხოვს ადგილზე პაციენტის გარკვეული პერიოდით დაყოვნებას,  რაც ტურისტისთვის არაკომფორტულია.გია გვარამიას ინფორმაციით, უცხოელი ტურისტების უმეტესობა აზერბაიჯანიდან  და რუსეთიდან ჩამოსული მოქალაქეები არიან. მცირე ნაწილი აშშ-სა და ევროპის ქვეყნებში მცხოვრები ქართველები.‘’ტურისტების წილი უფრო მეტი არ არის, ვიდრე პანდემიამდელ პერიოდში იყო. პირიქით,  ოდნავ ნაკლებიცაა.  შეიძლება ითქვას, რომ სამედიცინო ტურიზმი რეალურად ვერ განვითარდა, ამას ჩემი კომპანიის მაგალითზე ვამბობ.   ჩვენი სეგმენტი მაქვს მხედველობაში.  როგორც წესი, ჩვენს მიერ შესრულებული ოპერაციების შემდგომ პაციენტი გადის რეაბილიტაციის პერიოდს, რასაც, 2 კვირა მაინც სჭირდება. ამ პერიოდში ტურისტი ადგილზე უნდა იმყოფებოდეს. ის, რომ ჩაიტაროს ოპერაცია და წავიდეს ქვეყნიდან, ასე არ არის. როცა მუცლისა და სახის პლასტიკას იკეთებს ადამიანი, მეორე და მესამე დღეს ვერ წავა.  აქ ყოფნას ახანგრძლივებს და ესეც ერთ-ერთი ფაქტორია, რაც სამედიცინო ტურიზმის განვითარებას ხელს უშლის. შედარებისთვის, თმის გადანერგვის შემდგომ ეტაპზე პაციენტი აქტიურია, შეუძლია მეორე დღესვე წავიდეს სახლში. სახის დაჭიმვის ოპერაციას რომ იკეთებს, პირველი ორი კვირა სერიოზულ რეაბილიტაციას მოითხოვს. შესაბამისად, ვერ დაბრუნდება სამშობლოში“, - აცხადებს გია გვარამია.ესთეტიკური მედიცინის ცენტრის ხელმძღვანელი ასევე აცხადებს, რომ ქვეყანაში ყველა ოპერაცია, საკმაოდ მაღალი ხარისხით კეთდება, როგორც ეს საზღვარგარეთის შემთხვევაშია.„საქართველოში ფასი  გაცილებით დაბალია თან, ვმუშაობთ ზუსტად იმ მასალით რა მასალითაც მუშაობენ საზღვარგარეთ.  მიუხედავად იმისა, რომ ტარიფის ფაქტორი დიდია, კლინიკის შერჩევა, ეს უკვე სანდოობაზეა დამოკიდებული. ჩვენ რომ აქტიურად შევძლოთ უცხოელი პაციენტების მიღება, მაშინ კონკრეტულ ქვეყანაში უნდა გვქონდეს ფილიალი,  სადაც რეაბილიტაციის პერიოდის მონიტორინგს გაივლიან. ამის შესაძლებლობა ამ ეტაპზე არ არის”-აღნიშნავს გვარამია.რაც შეეხება კითხვას, სხვა ქვეყნებთან შედარებით ქართული პლასტიკური ქირურგია რამდენად კონკურენტუნარიანი, გია გვარამია აცხადებს, რომ ქვეყანა კონკურენტუნარიანია არსებული ხარისხისა და შედარებით დაბალი ფასის გამო.ცნობისთვის,  სამედიცინო პროცედურების ღირებულება ბოლო ერთ წელიწადში 7-10%-ით არის გაძვირებული. საფასო ცვლილების საფუძველია სამედიცინო მასალის მაღალი ფასი,  რაც თვითღირებულებასაც აძვირებს.

1707993840

სავაჭრო ცენტრებში ფართის ქირაობისთვის კომპანიები თვეობით და წლამდეც დგანან რიგში -  Noble Real Estate

თბილისში კომერციულ ფართებზე მოთხოვნა გაზრდილია, გასაქირავებელი ობიექტები კი  დეფიციტშია. როგორც კომპანია Noble Real Estate-ის დამფუძნებელი ვაჟა მებაღიშვილი ‘’ბიზნესპარტნიორთან“ აცხადებს, მოთხოვნა ყველაზე დიდია სავაჭრო ცენტრებში, სადაც არსებობს ე.წ. მომლოდინეთა სია და კომპანიებს თვეობით, ზოგჯერ, მთელი წელი უწევთ ლოდინი საჭირო ფართის დასაკავებლად.‘’საინტერესო ლიკვიდურ ადგილებზე დედაქალაქში მოთხოვნა გაზრდილია.  განსაკუთრებით იმ ადგილებში, სადაც მაღალი გამავლობა  და ფეხით მოსიარულეების რაოდენობა დიდია. რეალურად  ასეთი ლოკაციები მცირეა. შესაბამისად, მაღალი კონკურენციაა. ასევე დატვირთულია ბიზნესცენტრები, ფიზიკურად რა ფართებიც არის, არასაკმარისია. არსებობს მომლოდინეთა სია, კაფეებისთვის, მაღაზიებისთვის, შეიძლება 6 თვე ან თუნდაც ერთი წელი იყოს მოლოდინის რეჟიმი, მოთხოვნადი ადგილები  მოლებში მცირეა. აქედან გამომდინარე, ზოგჯერ ვადასაც ვერ აკონკრეტებენ, ვინაიდან სავაჭრო ცენტრები სრულად შევსებულია“, - აცხადებს ვაჟა მებაღიშვილი.მისი ინფორმაციით, ანალოგიური ვითარებაა ბიზნესცენტრებშიც, სადაც საოფისე ფართების სიმცირეა.მებაღიშვილის თქმით, დეფიციტს გაზრდილი მოთხოვნა განაპირობებს, ხოლო ნეგატიური მოცემულობა დაახლოებით 2 წელიწადში შეიცვლება, როცა ბაზარს ახალი ობიექტები დაემატება. მისი განცხადებით, სამშენებლო სფეროს განვითარება და ახალი პროექტები ამ მხრივ გარკვეულ გავლენას მოახდენს.  ველოდებით, რომ მიწოდების მასშტაბი გაიზრდება. ამ პროცესს დაახლოებით 2 წელი დასჭირდება.გარდა ამისა, Noble Real Estate-ის დამფუძნებელი ''ბიზნესპარტნიორტან" საუბრობს იმ გარემოებებზეც, რაც კომერციული ფართების დეფიციტს უკავშირდება.‘’კარგი ლოკაცია, რომელიც არის მოთხოვნადი და ბიზნესი შესულია, ამ ეტაპზე ვაკანტური არ არის. რეალურად მიწოდება გვიჭირს. კომპანიების უმეტესობა, ვინც ითხოვს ფართს, ადგილობრივი ბიზნესია, რომელიც დღეს უფრო განვითარდა. ამით არის მოთხოვნის ზრდაც განპირობებული. აქედან გამომდინარე, ბიზნესცენტრებში მაღალი დატვირთულობაა. თუკი სადმე დიდი ხნით ვერ ქირავდება ობიექტი, რაც ბევრს შეგვიჩნევია, მხოლოდ იმიტომ, რომ დამკვეთისთვის ის კონკრეტული ფართი საინტერესო არ არის ან სპეციფიკურია. შესაძლოა, ფასიც აცდენილი იყოს. ველოდებით, რომ სამშენებლო სექტორის მხრიდან მიწოდების მასშტაბი მოიმატებს და გაჩნდება საუკეთესო ლოკაციებზე განთავსებული ფართები ოფისებისთვის, რაც სადღაც 2025-2026 წლებში დაემატება ბაზარს.რაც შეეხება ფასს, 2023 წელს დაახლოებით 10-15%-იანი გაძვირება დაფიქსირდა. ომის პერიოდში საცხოვრებელი უძრავი ქონება სწრაფად და ელვისებურად თუ გაძვირდა, კომერციულ ფართებზე ასეთი მკვეთრი ცვლილება არ ყოფილა“, - აცხადებს ვაჟა მებაღიშვილი.შეგახსენებთ, რომ საქართველოში უძრავი ქონების გაძვირების ტენდენცია დაიწყო დაახლოებით 2 წლის წინ, რუსეთ-უკრაინის ომის დაწყების პერიოდიდან, რაც მიგრანტების მხრიდან მაღალი მოთხოვნით იყო გამოწვეული.მართალია, სიტუაცია მეტნაკლებად დასტაბილურდა, თუმცა, როგორც ვაჟა მებაღიშვილი აცხადებს, გაზრდილი ფასები დიდწილად შენარჩუნებულია და ჯერჯერობით ეს მოცემულობა არ შეიცვლება.

info@bp.ge

+995595334912

გამოგვყევით