1715252220

‘’რუისპირის ბიოდინამიური  მეურნეობა’’ ქართული ბიოღვინოს მწარმოებელი კომპანია საექსპორტო ქვეყნების სიას  აფართოებს.როგორც კომპანიის დამფუძნებელი და ხელმძღვანელი გიორგი ალადაშვილი ‘’ბიზნესპარტნიორთან“ აცხადებს,  "რუისპირის ბიოდინამიიური მეურნეობა" წელს  პირველად  ექსპორტის განხპრციელებას   იაპონიაში გეგმავს. ასევე დაგეგმილია ექსპორტის განახლება სინგაპურთან. ''რუისპირის მარნის" ბრენდით ამ ეტაპზე ღვინო ექსპორტზე  აშშ-ში, ბელგიაში, საფრანგეთში, შვეიცარიასა და იტალიაში გადის. თუმცა, კომპანიამ წელს ექსპორტი შეამცირა, რასაც გიორგი ალადაშვილი გლობალურ ბაზრებზე მიმდინარე ტენდენციას უკავშირებს.კომპანია ‘’რუისპირის მარნის“ ბრენდით 12-მდე დასახელების ბიოღვინოს აწარმოებს, როგორიცაა ღრუბელა (ღია წითელი),  მონალიზა, ზინგარელა,  ხიხვი, ქისი, სიმონასეული, საფერავი, იყალთოს წითელი და სხვა.გიორგი ალადაშვილის  ინფორმაციით, ექსპორტში  30%-იანი კლებაა, თუმცა ამას კომპანიისთვის პრობლემა არ შეუქმნია, ვინაიდან დანაკარგი ადგილობრივ ბაზარზე  გაყიდვების 60%-იანი ზრდით დაბალანსდა.‘’ჩემი სურვილია, რაც შეიძლება  მეტი ქართული ღვინო გავიდეს განვითარებული ქვეყნების ბაზრებზე, ინფორმაცია მივიდეს მომხმარებლამდე და სწორად შეგვაფასონ.  ევროპელებმა  ახლა დაიწყეს თავიანთი ღვინის დალევა, მაქსიმალურად ცდილობენ თავიანთი ქვეყნის პროდუქტის პოპულარიზაცია მოახდინონ.  ვფიქრობ, ტენდენცია დროებითია და სამომავლოდ ევროპულ ქვეყნებში ქართული ღვინის ექსპორტი გაიზრდება. მით უმეტეს, ვფიქრობთ ახალი ბაზრების ათვისებაზე, წელს ექსპორტს სინგაპურსა და იაპონიაშიც ვგეგმავთ", - აცხადებს ალადაშვილი.როგორც მეღვინე განმარტავს, წარმოება მთლიანად ბიოდინამიურია, რაც ცოცხალი პროდუქტების გამოყენებას და ტრადიციული გლეხური გამოცდილების გაზიარებას ნიშნავს. სპეციალურად ამ მიზნით გიორგი ალადაშვილი ღვინოს ბიოდინამიური მეთოდებით აწარმოებს. ამისთვის ყურძენს  მუხის ქერქის, ტირიფის, ჭინჭრის, ჯორისძუას, ხახვის ფოჩების, შროშანის და შრატის ნადუღით წამლავს, ხოლო გამწევი ტექნიკის საქმეს ცხენი აკეთებს. ღვინო კი ქვევრში, ტრადიციული მეთოდით მიიღება.’’რუისპირის მარნის“ წლიური წარმოება 5000-დან 7000 ბოთლამდეა.  თუმცა გამონაკლისი გასულ წელს იყო, როცა წარმოება 3200 ბოთლამდე შემცირდა. როგორც გიორგი ალადაშვილის აღნიშნავს, ამის მიზეზი ობიექტური იყო, ვინაიდან საქართველოში არ იმყოფებოდა და წარმოების პროცესში უშუალოდ არ იყო ჩართული. მეწარმის ვარაუდით, წელს მაქსიმუმ 7000 ბოთლამდე ღვინის წარმოებას შეძლებს.ცნობისთვის, "რუისპირის ბიოდინამიური მეურნეობა" თელავის რაიონში, სოფელ რუისპირში ბიოღვინოს აწარმოებს. ვენახი 5 ჰექტარზეა გაშენებული.

1715082180

ახალციხეში მდებარე სასტუმრო ''ლომსია"  ზაფხულის აქტიური სეზონისთვის  მზადაა. როგორც სასტუმროს დირექტორი ამირან ქიმერიძე ''ბიზნესპარტნიორთან" აცხადებს, კომპანია ჯავშნებს უკვე იღებს.  მოთხოვნა გაზრდილია აზიური ქვეყნებიდან, განსაკუთრებით ჩინეთიდან, რის ტენდენციაც 2023 წლიდან შეიმჩნევა.ამირან ქიმერიძის თქმით, ჩინური ბაზრის გააქტიურება სავიზო რეჟიმის შემოღებას ნაკლებად უკავშირდება. მიზეზი ძირითადად ქართული და უცხოური (ძირითადად, აზერბაიჯანული) ტურისტული კომპანიების ჩინურ ბაზრებზე გააქტიურებაა, რისი ტენდენციაც დაახლოებით 2-3 წლის წინ დაიწყო. კერძოდ, ჩინეთიდან ტურები წელს დაახლოებით 20%-ით არის გაზრდილი.  გარკვეული დაინტერესება არის ყაზახეთიდან და ყირგიზეთიდანაც.  ტურისტული ნაკადები ისრაელიდან და ევროკავშირის ქვეყნებიდან შემცირებულია.''ისრაელიდან ტურების შემცირებაზე პოლიტიკურმა მდგომარეობამ იქონია გავლენა. ანალოგიურად შემცირდა დაინტერსება  ევროპიდანაც, აქ უკვე მიჭირს ვარაუდი, რაც შეიძლება გამოეწვია კლება, ვერ გეტყვით. თუმცა ჩინეთიდან მოთხოვნის ზრდა დადებითი ტენდენციაა. როგორც ვიცი, მათი კანონმდებლობა,  კომპანიებს ავალდებულებს დაასვენოს მათი თანამშრომელი გარკვეული პერიოდით და  ალბათ ამანაც განსაზღვრა ჩინელების ტურიზმით დაინტერესება, რასაც უკვე სავიზო რეჟიმის შემოღებაც ხელს შეუწყობს. მთლიანობაში, 2023 წლის მდგომარეობით, ჯავშნები შემცირებულია. შეიძლება ითქვას, რომ  განახევრებულია", - აღნიშნავს ამირან ქიმერიძე.კერძოდ, როგორც ''ლომსიას" დირექტორი განმარტავს, პანდემიამდელ პერიოდში წლიურად 8 000 ოთახ-ღამე  (ერთი გაყიდული ოთახი ერთი ღამე) იჯავშნებოდა, 2023 წელს მათი რაოდენობა 4 000-მდე შემცირდა. ''მიმდინარე წელს უკვე არის 4 500 ჯავშანი, მაგრამ არ ვიცით, წლის ბოლომდე რა  შედეგზე გავალთ. მოლოდინი უკეთესია იმასთან შედარებით, რაც შარშან იყო.  რაღაც ნაწილი  მიდის შედარებით იაფფასიან სასტუმროში, რადგან კონკურენტმა სასტუმრომ უფრო ნაკლები ფასი შესთავაზა. არაჯანსაღი კონკურენციაა და წინასწარ პროგნოზი გვიჭირს, საბოლოოდ რა შედეგი შეიძლება დავდოთ", -  აცხადებს ამირან ქიმერიძე ''ბიზნესპარტნიორთან".ცნობისთვის, ახალციხეში სასტუმრო „ლომსია“ „ვისოლ ჯგუფმა“ 2012 წლის აგვისტოში გახსნა და სასტუმროს მშენებლობისათვის რამდენიმე მილიონი ლარის ინვესტიცია განახორციელა. 2014 წელს „ვისოლ ჯგუფში“ არაპროფილური აქტივების გაყიდვის გეგმების შესახებ საუბრობდნენ, თუმცა მფლობელებმა სასტუმროს გაყიდვა გადაიფიქრეს და ის „ვისოლ ჯგუფის“ შვილობილ სარეკლამო კომპანიას „ველაჯიო“ გადაეცა. ‘’ლომსიაში’’ 63 ნომერია და 150-მდე სტუმარზეა გათვლილი.

1715073180

ქართული ორნამენტებისა და თანამედროვე ინტერიერის აქსესუარების სახელოსნო ''იგრიკა" სახელოსნოს გაფართოებას და ე.წ შოურუმის გახსნას გეგმავს.როგორც კომპანიის თანადამფუძნებელი გრიგოლ დალაქიშვილი ''ბიზნესპარტნიორთან" აცხადებს, ამ ეტაპზე მცირე სახელოსნო საოჯახო გარემოშია მოწყობილი. სახელოსნო-შოურუმის პროექტი გულისხმობს პირდაპირ კომუნიკაციას მომხმარებელთან, სადაც სივრცე ნებისმიერი დაინტერესებული პირისთვის ღია იქნება.დალაქიშვილი ამ ეტაპზე ინვესტიციის მოცულობას ვერ აკონკრეტებს და აღნიშნავს, რომ ხარჯი ჯერჯერობით დაზუსტებული არ აქვთ, არც პროექტის განხორციელების ვადაა ცნობილი, თუმცა კომპანია გაფართოების პროექტზე მუშაობას 2025 წლისთვის განიხილავს.რაც შეეხება ,,იგრიკას“ ნამუშევრების სპეციფიკას - ტექსტილის აქსესუარებს,  რასაც გრიგოლ დალაქიშვილი მეუღლესთან - ბაია ლომსაძესთან ერთად ქმნის, უმეტესობა მათ მიერვე შექმნილი,  ხელით  დაბეჭდილი, ტექსტილზე შესრულებული ნამუშევრებია. დიზაინი ქართულ მოტივებზეა დაფუძნებული, განსხვავებული ინტერპრეტაციით იქმნება მათი ესკიზებიც -  რანერი სუფრა და  კედლის დეკორი. ''იგრიკას" ახალი მიმართულება - ქართული ზღაპრების შთაგონებით შექმნილი დეკორია. როგორც ''იგრიკას" თანადამფუძნებელი აღნიშნავს, გაყიდვების ტენდენცია მზარდია. მიმდინარე წლის პირველ კვარტალში, წინა წლის ანალოგიურ პერიოდთან შედარებით, რეალიზაცია დაახლოებით 20%-ით არის გაზრდილი.გრიგოლ დალაქიშვილის თქმით, მსგავსი წარმოების ერთ-ერთი გამოწვევა მაღალი ხარისხის ნედლეულია, რის გამოც შეძენა  ძირითადად უცხოური ბაზრებიდან ხდება.''ჩვენი მასალების უმეტესობა საზღვარგარეთიდან, ძირითადად, ევროკავშირის ქვეყნებიდან შემოგვაქვს. ჩვენი მომხმარებელია ქართულ კულტურაზე ან უბრალოდ ესთეტიკურ, მრავალფეროვან ინტერიერზე შეყვარებული ადამიანი, როგორც ქართველები, ასევე ტურისტებიც, ამ სეგმენტზე გაყიდვების თითქმის ნახევარი მოდის. ''იგრიკამ'' მიგვახვედრა,  რომ ქართული კულტურული მემკვიდრეობა თანაბრად ძვირფასია ნებისმიერი ადამიანისთვის, ვისაც ქართული კულტურა და ტრადიცია იზიდავს. მიუხედავად იმისა, რომ ონლაინ მაღაზია საკმაოდ კომფორტული აღმოჩნდა უამრავი ადამიანისთვის, მაინც ვფიქრობთ, რომ ნამუშევრების ადგილზე დათვალიერება და მომხმარებელთან პირდაპირი კავშირი წარმოებისთვის მნიშვნელოვანი ფაქტორია. სახელოსნო-შოურუმის გახსნის ერთ-ერთი მთავარი მოტივიც ეს არის", - აცხადებს გრიგოლ დალაქიშვილი ''ბიზნესპარტნიორთან".მისივე ინფორმაციით, პროდუქტის შეძენა შესაძლებელია, როგორც სოციალური ქსელით, ასევე  ''იგრიკას'' ვებგვერდის igrikashop.com-ის მეშვეობით. ბრენდი წარმოდგენილია ასევე ტექსტილის მაღაზიაში ''ბამბა მამბა"   და უკვე VELI.store -ზეც.ცნობისთვის, ''იგრიკა'',  როგორც ბრენდი, 2020 წლის აპრილში შეიქმნა. სიმბოლურია, რომ იგრიკა უძველესი ქართული სიტყვაა და აპრილს ნიშნავს.ხელნაკეთი ნივთების სახელოსნო მომხმარებლებს  ხელით ნაბეჭდ სუფრებს, მაგიდის ბილიკებს, ბალიშის პირებს, ჩანთებს, ხელით მოჩუქურთმებულ ხის დაფებს და ასევე უნიკალურ ექს–ლიბრისებს  (ქართულად გაფორმებული ნიშანი)  სთავაზობს.

1714810020

ინტერიერის აქსესუარების სახელოსნო ''იგრიკას" სააღდგომო კოლექციაზე მოთხოვნა 20%-ით გაიზარდა.როგორც კომპანიის თანადამფუძნებელი გრიგოლ დალაქიშვილი ''ბიზნესპარტნიორთან" აცხადებს,  აღდგომის დღესასწაულისთვის სპეციალურად შეიქმნა მეწამულ ქსოვილზე დაბეჭდილი "იფრარის ყვავილები"  და სააღდგომო ხასიათის ''მაგიდის ბილიკი'', რომელიც გაყიდვებში მოწინავე პოზიციაზეა.დალაქიშვილის თქმით, ასევე მაღალია მოთხოვნა სხვადასხვა ტიპის ნიმუშებზე, როგორიცაა სელის კედლის დეკორები, ხის დეკორები, დაფები და სხვადასხვა თემატიკის რანერები.''იგრიკას" ნამუშევრები ძირითადად ონლაინ, სოციალური ქსელის მეშვეობით და გამოფენა-ფესტივალებზე იყიდება. ასევე წარმოდგენილია ტექსტილის მაღაზიაში ''ბამბა მამბა" და  უკვე VELI.store-ზეც.''იგრიკას" მიზანია, ძველი ქართული სიმბოლოები თანამედროვეობაში ისე გააცოცხლოს, რომ მათი მნიშვნელობა არ დაიკარგოს. თითოეული ნამუშევარი ხელნაკეთი და უნიკალურია.როგორც გრიგოლ დალაქიშვილი აღნიშნავს, პროდუქციას როგორც ქართველები, ისე უცხოელებიც აქტიურად ყიდულობენ. თუმცა კონკრეტულად სააღდგომო კოლექციაზე მოთხოვნა უმეტესად ადგილობრივი მოსახლეობის მხრიდან შეიმჩნევა. ''სადღესასწაულო პერიოდებში ''იგრიკას" კოლექციაზე განსაკუთრებით მზარდია ინტერესი და ამ მხრივ სააღდგომო პერიოდი აშკარად გამოირჩევა. ამ ეტაპზე აქცენტი მეწამულ ქსოვილზე გავაკეთეთ. მოთხოვნა, წინა წლის ანალოგიურ პერიოდთან შედარებით 20%-ით არის გაზრდილი და ვფიქრობთ, კიდევ მოიმატებს, მოლოდინი ამ მხრივ დადებითია.  სხვათაშორის, გასული წლის აღდგომა ჩვენთვის ძალიან საინტერესო აღმოჩნდა: რამდენიმე პერსონალური შეკვეთა მივიღეთ და ჩვენმა დეკორებმა არაერთი სააღდგომო სუფრა დაამშვენეს. ჩვენმა ნამუშევრებმა საგრძნობლად მეტი ადამიანის ყურადღება მიიქცია და გარკვეულწილად ამანაც განაპირობა, რომ წელს მოთხოვნა გაიზარდა", - აცხადებს გრიგოლ დალაქიშვილი.ცნობისთვის, ''იგრიკა'',  როგორც ბრენდი, 2020 წლის აპრილში შეიქმნა. მისი დამფუძნებლები ახალგაზრდა წყვილი გრიგოლ დალაქიშვილი და ბაია ლომსაძეა. ხელნაკეთი ნივთების სახელოსნოა, რომელიც მომხმარებლებს  ხელით ნაბეჭდ სუფრებს, მაგიდის ბილიკებს, ბალიშის პირებს, ჩანთებს, ხელით მოჩუქურთმებულ ხის დაფებს და ასევე უნიკალურ ექს–ლიბრისებს  (ქართულად გაფორმებული ნიშანი) სთავაზობს.

1714803780

ლეჩხუმში, ჯონოულის ხეობაში საკურას ხეივანი შემოდგომის ბოლოს გაშენდება. ამ ეტაპზე სამუშაოების მცირე ნაწილია შესრულებული.როგორც იდეის ავტორი, ''დაკარგული სამოთხის" დამფუძნებელი ლექსო ჩარკვიანი ''ბიზნესპარტნიორთან" აცხადებს, იგეგმება  5 კმ-იანი ორმხრივი ხეივნის გაშენება, რომელიც მსოფლიოში ერთ-ერთი ყველაზე გრძელი საკურას ხეივანი იქნება.ჩარკვიანის განმარტებით, საკურა, ეს არის იგივე  ველური მწარე ბალი, რომელიც  შესაძლებელია სასარგებლო ხედ გარდაიქმნას. აღმოსავლეთ აზიაში მისი 7 სახეობაა გავრცელებული. მცენარე ყვავილობს საქართველოშიც, ძირითადად  2 სახეობა:  იაპონური საკურა ვარდისფერი კოკრებით (7-8 სმ. დიამეტრის) და  4-ფოთლიანი, რომელიც მტირალა ტირიფს წააგავს. ჯონოულის ხეობაში მწარე ბლისგან   გამოყვანილი საკურა გაშენდება.''დაკარგული სამოთხე" ლექსო ჩარკვიანის  მიერ შექმნილი გვერდია სოციალურ ქსელში, რასაც იგი სხვადასხვა სოციალური პროექტის გასაშუქებლად იყენებს. საკურას ხეივნის შექმნის იდეაც პირველად სწორედ აქ დაანონსდა. პროექტი ინვესტიციის გარეშე, მთლიანად მოსახლეობის მხარდაჭერით (ენთუზიაზმით) ხორციელდება. ჩართული არიან ასევე ადგილობრივი მუნიციპალიტეტის წარმომადგენლები, რომლებიც საჭირო  ტექნიკით ეხმარებიან. რაც შეეხება ამ ეტაპისთვის შესრულებულ სამუშაოს, როგორც ჩარკვიანი განმარტავს, 1500 მეტრზე  მწარე ბლის საძირეები განთავსდა. აგვისტოში მათზე კვირტს დაიტანენ, საძირეების დათესვის პროცესი კი შემოდგომაზე გაგრძელდება და ამავე პერიოდში დასრულდება. დაახლოებით ორ წელიწადში კი ტურისტებს საკურას  ხეივნის დათვალიერება შეეძლებათ.პროექტის მიზანი სწორედ ლეჩხუმის ტურისტული პოტენციალის ათვისება და დარგის განვითარებაა. ჩარკვიანის თქმით, გადაწყვეტილება გამოცდილებამ განაპირობა, რაც ტურისტულ ინდუსტრიაში მუშაობისას დაუგროვდა. აღმოჩნდა, რომ ტურისტების ნაწილი, რომელიც საქართველოს სხვადასხვა კურორტს სტუმრობს, ლეჩხუმის შესახებ თითქმის არ ფლობს ინფორმაციას და არ ინტერესდება, როცა მუნიციპალიტეტი ტურისტულად საინტერესო ლოკაციაა და შესაძლებელია საქართველოს მასშტაბით ერთ-ერთი გამორჩეული ადგილი  გახდეს. ''7-8 წლის განმავლობაში გიდობას ვუწევდი ტურისტებს  სხვადასხვა რეგიონში. მათ აინტერესებდათ ბორჯომი, რაბათი, ბაღდათი ხულო და სხვა. ლეჩხუმით ფაქტობრივად არავინ ინტერესდებოდა, ამიტომ ვცდილობდი, მე თვითონ გამეცნო იგი ვიზიტორებისთვის, სწორად მიმეტანა ინფორმაცია და ინტერესი გამომეწვია.  ისეც ხდებოდა, რომ ინფორმაციის გაზიარების შემდეგ ხშირად უკვე სპეციალურად  მოდიოდნენ ლეჩხუმში და ტურებს  ვაწყობდით. საკურა ამ მხრივ ქმნის დიდ შესაძლებლობას, რომ ტურისტები მსოფლიოს სხვადასხვა ქვეყნიდან მოიზიდოს. როდესაც ხეივანი მზად იქნება, ლეჩხუმში ყველა საოჯახო სასტუმრო და კემპინგი 100%-ით დაიტვირთება. უამრავი საინტერესო ადგილია, მათ შორის, ,,ქულბაქის მწვანე ტბები", სამონასტრო კომპლექსი და სხვა, რაც ტურისტმა აუცილებლად უნდა მოინახულოს. გარდა ამისა, მოეწყობა გამოფენა-გაყიდვები, რაც ადგილობრივ მეწარმეებს ძალიან დაეხმარება", - აცხადებს ლექსო ჩარკვიანი.საკურას ყვავილობა აპრილის შუა რიცხვებში, ბოლო ყინვიდან  იწყება და ორ კვირას გრძელდება. ცნობისთვის სოციალური გვერდი ''დაკარგული სამოთხე" ლექსო ჩარკვიანმა 7 წლის წინ შექმნა, რომლის მიზანიც სასარგებლო კონტენტის შექმნა და მაღალმთიანი რეგიონის (რაჭა-ლეჩხუმი) დახმარებაა, რაც მოსახლეობის დაბრუნებას და ადგილზე დამაგრებას შეუწყობს ხელს.საკურას ხეივანისთვის საჭირო მწარე ბლის საძირეები ლექსო ჩარკვიანს საკუთარ სანერგეზე გამოჰყავს, ნაწილით - მოსახლეობა ამარაგებს.  მცირე სანერგე მეურნეობას იგი ქუთაისის მახლობლად, სათაფლიასთან, 2500 მ. ფართობზე  მდებარეობს. 

1714654023

საქართველოს ეროვნულ ბანკის პრეზიდენტის მოვალეობის შემსრულებელმა ნათია თურნავამ და ელევანდის აღმასრულებელმა დირექტორმა პატ პატელმა ურთიერთგაგების მემორანდუმს მოაწერეს ხელი.ხელმოწერა აზიის განვითარების ბანკის (ADB) 57-ე წლიური შეხვედრის ფარგლებში შედგა, რომელიც მიზნად ისახავს საქართველოს ეროვნულ ბანკსა და ელევანდს შორის ურთიერთთანამშრომლობის გაღრმავებას.მემორანდუმის მიხედვით, მხარეები გამოთქვამენ მზადყოფნას სამომავლო თანამშრომლობისათვის, რათა ჩამოაყალიბონ თანამშრომლობის საფუძველი  განვითარების მხარდასაჭერად, რამაც ხელი უნდა შეუწყო ცოდნისა და გამოცდილების ეფექტურ გაზიარებას ფინანსური ტექნოლოგიების ინდუსტრიაში.აღიარებენ რა საქართველოს პოტენციალს შუა დერეფანში, მხარეები განიხილავენ ურთიერთთანამშრომლობის შესაძლებლობას საქართველოს, როგორც რეგიონული ფინტექ ჰაბის მხარდასაჭერად. სწორედ ამ მიზნით, ელევანდი თანახმაა მხარი დაუჭიროს ისეთ ინიციატივებს, რომლებიც საქართველოს ფინტექ ეკოსისტემის პოპულარიზაციას ისახავს მიზნად.შეთანხმების მიხედვით, მხარეების გეგმავენ ერთობლივად მოაწყონ პირისპირ და ვირტუალური ფორმატის სემინარები და ტრენინგები, რომლებიც  საქართველოში არსებული და პერსპექტიული ფინტექ კომპანიების ცნობიერებისა  და ცოდნის გაზრდაზეა მიმართული.მემორანდუმის  მიხედვით, მხარეები იღებენ ვალდებულებას მოაწყონ მრგვალი მაგიდის დისკუსიები და ფორუმები, რომლებიც გააერთიანებს მარეგულირებლებს, პოლიტიკის შემქმნელებს, დარგის ლიდერებს და სხვა დაინტერესებულ მხარეებს ფინტექის სფეროში თანამშრომლობის შესაძლებლობების შესასწავლად, გამოწვევების მოსაგვარებლად და ფინტექის განვითარებისთვის ხელსაყრელი გარემოს ხელშესაწყობად.ელევანდი სინგაპურის მონეტარული ორგანოს (Monetary Authority of Singapore) მიერ დაარსებული არაკომერციული ორგანიზაციაა, რომელიც მთავრობის, ბიზნესის, საგანმანათლებლო წრეებისა და სამოქალაქო საზოგადოების ლიდერებთან ურთიერთობით ხელს უწყობს საერთაშორისო თანამშრომლობას ნოვატორული ტექნოლოგიების, მათი გამოყენებისა და დანერგვის მიმართულებით.  

1714653000

ახალციხეში მდებარე სასტუმრო "ლომსიას"  ბიზნესის გაფართოების პროექტი დაპაუზდა. სასტუმროს დირექტორი ამირან ქიმერიძე ამის მიზეზად ბაზარზე არაჯანსაღ კონკურენციას მიიჩნევს. კერძოდ, როგორც ქიმერიძე ''ბიზნესპარტნიორთან"  განმარტავს, ახალციხეში, ერთ-ერთი  5-ვარსკვლავიანი სასტუმროს გახსნამ და ბაზარზე არაკონკურენტული ფასების შეთავაზებამ, 4 და 3-ვარსკვლავიანი სასტუმროების საქმიანობას დიდი პრობლემა შეუქმნა, მათ შორის, "ლომსიას", რომელიც 4 ვარსკვლავიანი სასტუმროა.ქიმერიძის განცხადებით, ჯერ კიდევ პანდემიამდელ პერიოდში იგეგმებოდა "ლომსიას"  გაფართოება და 1-1,2 მლნ ლარის ინვესტირება. პროექტი მოიცავდა საკონფერენციო დარბაზის მოწყობას და 12-მდე ნომრის დამატებას, რაც ჯერჯერობით ვერ ხორციელდება.მისივე ინფორმაციით, სასტუმრო "ლომსიას" მენეჯმენტი  აკვირდება დინამიკას, კერძოდ, იმას, თუ  საბოლოოდ რა ტენდენცია ჩამოყალიბდება,  რა სერვისი იქნება აქტუალური და მომხმარებლისთვის მისაღები. როგორც ქიმერიძე აღნიშნავს, მთავარი პრობლემა ბაზარზე არაკონკურენტული ფასებია, რაც ბევრი სასტუმროსთვის დაბრკოლებად იქცა. განსაკუთრებით კი 3-ვარსკვლავიანმა სასტუმროებმა განიცადეს პრობლემა, რომლებიც ბაზარზე შედარებით დაბალი ფასებით ოპერირებენ.''ბუნებრივია, როდესაც 5-ვარსკვლავიან სასტუმროს აქვს ის ფასი, რაც  შეესაბამება დაახლოებით 3-4-ვარსკვლავიანი სასტუმროს ღირებულებას ოთახებზე,  ეს იმას ნიშნავს, რომ ახალი მოთამაშე  ცდილობს  კარგად აითვისოს აღნიშნული ბაზარი და  კონკურენტებს დიდ დარტყმებს აყენებს - ავტომატურად  იცვლება ფასები კონკურენტ სასტუმროებში. მთლიანობაში, ეს არის დიდი პრობლემა, რადგან დღეს ახალციხეში  4- ვარსკვლავიანი სასტუმროს რაოდენობა 3-4-ს ვერ აჭარბებს,  დანარჩენი  2-3-ვარსკვლავიანი  უკვე ძალიან ბევრია და ფაქტობრივად ყველას პრობლემა ექმნება“, -  აცხადებს ამირან ქიმერიძე."ლომსიას“ დირექტორი კონკურენციის საკითხს რეგიონულ ჭრილშიც მიმოიხილავს. მისი თქმით, მომხმარებლების გარკვეული სეგმენტი  ბაკურიანს ახალციხის ხარჯზე მოაკლდა, თუმცა ამას პრობლემა არ გამოუწვევია, რადგან ბაკურიანი ტურისტულად კარგად ათვისებული კურორტია.,,ტურისტულ კომპანიებს, რომლებსაც  ვარძიაში მოჰყავთ ვიზიტორები, ცდილობენ, დროის დაზოგვის მიზნით გააჩერონ  სტუმრები  ახალციხეში და არა ბაკურიანში.  ახალციხეში როგორც კი ნახეს რაღაც სასტუმრო, სადაც შეიძლება ტურისტების გაჩერება და სერვისი შეესაბამება მათ მოთხოვნას, არჩევანიც ამის მიხედვით გააკეთეს. ვფიქრობ, ეს ვარ დააზარალებს ბაკურიანს, რადგან  რაც არ უნდა იყოს, ვერანაირად გავუწევთ კონკურენციას. რა პოტენციალიც აქვს ბაკურიანს, სასტუმროების რაოდენობის კუთხით, ახალციხეში მეათედიც აღარ არის", -  აცხადებს ამირან ქიმერიძე ‘’ბიზნესპარტნიორთან“.ცნობისთვის, ახალციხეში სასტუმრო „ლომსია“ „ვისოლ ჯგუფმა“ 2012 წლის აგვისტოში გახსნა და სასტუმროს მშენებლობისათვის რამდენიმე მილიონი ლარის ინვესტიცია განახორციელა. 2014 წელს „ვისოლ ჯგუფში“ არაპროფილური აქტივების გაყიდვის გეგმების შესახებ საუბრობდნენ, თუმცა მფლობელებმა სასტუმროს გაყიდვა გადაიფიქრეს და ის „ვისოლ ჯგუფის“ შვილობილ სარეკლამო კომპანიას „ველაჯიო“ გადაეცა. "ლომსიაში" 63 ნომერია და 115-მდე სტუმარზეა გათვლილი.

1714575014

საქართველოს ეროვნული ბანკი (სებ), ანალიტიკური კომუნიკაციის გაუმჯობესების მიზნით, კვლევითი ნაშრომების გამოქვეყნებას განაგრძობს. კვლევითი ნაშრომების მიზანია წვლილი შეიტანოს ცენტრალური ბანკებისა და ეკონომისტებისათვის მნიშვნელოვანი თემების შესწავლაში.ნაშრომების სერია ვრცელდება კვლევებში განხილულ თემებზე დისკუსიის ხელშესაწყობად და უკუკავშირის მისაღებად. კვლევითი ნაშრომების სერიას კოორდინირებას უწევს საქართველოს ეროვნული ბანკის მაკროეკონომიკური კვლევების განყოფილება და ფოკუსირებულია ცენტრალური ბანკებისათვის ისეთ რელევანტურ თემებზე, როგორებიცაა - მაკროეკონომიკური მოდელირება, მონეტარული და სავალუტო პოლიტიკა, ფინანსური სტაბილურობა და სხვა.მორიგი კვლევითი ნაშრომი "საქართველოს ეკონომიკის DSGE მოდელი: მზარდი ეკონომიკის ფრიქციების LEGO", მომზადდა საქართველოს ეროვნული ბანკის მაკროეკონომიკისა და სტატისტიკის დეპარტამენტის თანამშრომლების მიერ. აღნიშნული ახლად შექმნილი DSGE მოდელი არის მნიშვნელოვანი დამატებითი ხელსაწყო საქართველოს ეროვნული ბანკის ანალიზისა და პროგნოზირების სისტემისათვის. აღნიშნული DSGE მოდელი განვრცობილია რეალური ეკონომიკისა და საგარეო სექტორის დეტალური სტრუქტურით. ამდენად, შესაძლებელს ხდის მზარდი ეკონომიკებისთვის დამახასიათებელი მიწოდებისა და საგარეო შოკების უფრო სიღრმისეულ ანალიზს. მიუხედავად იმისა, რომ მოდელის გარკვეული მახასიათებლები უკვე სტანდარტულად გამოიყენება ლიტერატურაში, ჩვენ ასევე გავითვალისწინეთ ნაკლებად სტანდარტული, მაგრამ საქართველოსთვის მნიშვნელოვანი მახასიათებლებიც.კვლევითი ნაშრომების ნახვა შესაძლებელია შემდეგ მისამართზე.

1714574638

ფინანსთა მინისტრი ლაშა ხუციშვილი ევროპის საინვესტიციო ბანკის (EIB) ვიცე-პრეზიდენტ ტერეზა ჩერვინსკას შეხვდა. შეხვედრას დაესწრნენ ფინანსთა მინისტრის მოადგილე ეკატერინე გუნცაძე, ევროპის საინვესტიციო ბანკის რეგიონული წარმომადგენლობის ხელმძღვანელი სამხრეთ კავკასიაში, მაჩიე ჩურა, ევროპის საინვესტიციო ბანკი გლობალის დირექტორი, ლიონელ რაპაი და ვიცე-პრეზიდენტის კაბინეტის უფროსი ლილიანა ბოგუში. მხარეებმა განიხილეს საქართველოსა და ევროპის საინვესტიციო ბანკის თანამშრომლობის საკითხები.  ფინანსთა მინისტრმა ბანკის ვიცე-პრეზიდენტს მადლობა გადაუხადა იმ მხარდაჭერისთვის, რომელსაც ევროპის საინვესტიციო ბანკი წლების განმავლობაში უწევს საქართველოს, როგორც ევროინტეგრაციის, ისე რეფორმების მიმართულებით.