logo
Loading data...
მთავარი ჯანდაცვა

სტატია

სისხლის ბანკებისთვის არაკომერციულ პირად დარეგისტრირების ვალდებულება 1 დეკემბრამდე გადაიდო

სისხლის ბანკებისთვის არაკომერციულ პირად დარეგისტრირების ვალდებულება 1 დეკემბრამდე გადაიდო

1719303053

ჯანმრთელობის დაცვისა და სოციალურ საკითხთა კომიტეტმა „ადამიანის სისხლისა და მისი კომპონენტების ხარისხისა და უსაფრთხოების შესახებ“ კანონში ცვლილების პროექტზე იმსჯელა და პარლამენტის პლენარულ სხდომაზე განსახილველად გატანას მხარი დაუჭირა.

პარლამენტის მიერ გავრცელებული ინფორმაციით, კანონში ცვლილება სისხლის გადასხმის დაწესებულების, ან სისხლის ბანკის არასამეწარმეო (არაკომერციული) იურიდიული პირის ორგანიზაციულ-სამართლებრივი ფორმით დარეგისტრირების კანონით განსაზღვრული ვადის გახანგრძლივებას ეხება.

მომხსენებლის, ჯანმრთელობის დაცვისა და სოციალურ საკითხთა კომიტეტის თავმჯდომარის, ზაზა ლომინაძის განცხადებით, კანონის მოქმედი რედაქციის გარდამავალი დებულების მიხედვით, „ადამიანის სისხლისა და მისი კომპონენტების ხარისხისა და უსაფრთხოების შესახებ“ კანონის ამოქმედებამდე მოქმედი სისხლის დაწესებულება ვალდებულია 2024 წლის 1 ივლისამდე დარეგისტრირდეს კანონით გათვალისწინებული არასამეწარმეო (არაკომერციული) იურიდიული პირის ორგანიზაციულ-სამართლებრივი ფორმით. ცვლილების თანახმად კი, აღნიშნული ვადის გადაწევა 2024 წლის 1 დეკემბრამდე ხდება.

როგორც კომიტეტის თავმჯდომარემ აღნიშნა, დღეს ქვეყანაში შესაბამისი ლიცენზიის მქონე 24 დაწესებულება მოქმედებს, რომელთაგან არასამეწარმეო (არაკომერციული) იურიდიული პირის ფორმით მხოლოდ სამი ფუნქციონირებს, ხოლო სამ მათგანთან დაკავშირებით ლიცენზიის განახლების მოთხოვნით ადმინისტრაციული წარმოება მიმდინარეობს.

„იმისათვის, რომ დაწესებულებების ორგანიზაციული სტრუქტურის ჩამოყალიბების ეტაპზე უსაფრთხო სისხლისა და სისხლის კომპონენტებით უზრუნველყოფის პროცესს ხელი არ შეეშალოს, საკითხის მნიშვნელობისა და მასშტაბის გათვალისწინებით, მიზანშეწონილია, „ადამიანის სისხლისა და მისი კომპონენტების ხარისხისა და უსაფრთხოების შესახებ“ საქართველოს კანონის ამოქმედებამდე მოქმედი სისხლის დაწესებულებების არასამეწარმეო (არაკომერციული) იურიდიული პირის ორგანიზაციულ-სამართლებრივი ფორმით რეგისტრაციის კანონით დადგენილი ვადის გადავადება“, - განაცხადა ზაზა ლომინაძემ.

მისივე თქმით, მნიშვნელოვანია აღინიშნოს, რომ სახელმწიფო ცენტრალური სისხლის დაწესებულების შექმნისა და ჩამოყალიბების ორგანიზაციულ-სამართლებრივ საკითხებზე უკვე მუშაობს.
კანონპროექტს პარლამენტი გამარტივებული წესით იხილავს.

კანონპროექტის ინიციატორები არიან საქართველოს პარლამენტის წევრები: ზაზა ლომინაძე, ვლადიმერ კახაძე, დიმიტრი ხუნდაძე და ზაალ მიქელაძე.

jandacva.ge

გამოგვყევით