ჩვენი სტუმრები უმეტესად უცხოელები არიან, რადგან ქართული ბაზრის მოთხოვნებს ვერ ვაკმაყოფილებთ. კერძოდ, ჩვენს ნომრებში არ არის სამზარეულო, სტუმარს კერძების თავად მომზადება არ შეუძლია და ქართველების უმეტესობა ამის გამო ჩვენთან დარჩენისგან თავს იკავებს, - ამის შესახებ სასტუმრო "ცეცეს" თანადამფუძნებელმა თინათინ იდიძემ "ბიზნესპარტნიორთან" განაცხადა.
მისივე თქმით, სასტუმროს დამსვენებლების საერთო მაჩვენებლებში ქართველი მომხმარებლების წილი, დაახლოებით, 10%-ია.
"გასულ წელთან შედარებით, მოთხოვნა გაზრდილია, რასაც სასტუმროს მიმართ ცნობადობის ზრდას ვუკავშირებთ. შეიძლება ითქვას, რომ წინა წლის ანალოგიურ პერიოდთან შედარებით, მოთხოვნა დაახლოებით, 50%-ით არის გაზრდილი. ძირითადად ჩვენი სტუმრები ისრაელიდან და ევროპის სხვადასხვა ქვეყნიდან არიან. ჩვენი უცხოელი სტუმრების მნიშვნელოვანი წილი, დაახლოებით, 60% ისრაელიდან არიან", - აცხადებს თინათინ .
სასტუმროს თანადამფუძნებლის ცნობით, თუშეთში წელს განსაკუთრებით კარგი პირობებია გზებზე და ინფრასტრუქტურული სამუშაოები აქტიურად მიმდინარეობს.
"ზამთრის სეზონზე ყველასთვის ცნობილია, რომ თუშეთი დაკეტილია და არც ჩვენ არ გვაქვს მოლოდინი, რომ ამ პერიოდში ვიმუშავებთ. წელს ადრე გაიხსნა გზები და ივნისის დასაწყისიდან განვაახლეთ მუშაობა. წელს განსაკუთრებით კარგი პირობებია გზებზე, აქტიურად მიმდინარეობს ინფრასტრუქტურული სამუშაოები სხვადასხვა ტიპის, მათ შორის, სადრენაჟე სისტემებისა და ეროზიების გაწმენდის კუთხით. იმედი მაქვს, როდესაც მიწა ჩამოიშლება გზებზე, დროულად მოხდება გაწმენდა, რადგან კრიტიკულად მნიშვნელოვანია ერთი დღითაც კი, რომ არ გავჩერდეთ. საფრთხის შეფასება სუბიექტურია. აქტიური ეროზიები არ არის, ანუ გზაზე გავლის დროს რამე ჩამოიშალოს - ამის საშიშროება არ არის. ერთადერთი საფრთხე, რაც უცხოელისთვის შეიძლება იყოს, გზის ჩაკეტვის გამო ფრენაზე დაგვიანებაა", - განაცხადა თინათინ იდიძემ.
მანვე აღნიშნა, რომ სასტუმრო საშუალო საფასო კატეგორიის სეგმენტს მიეკუთვნება.
ცნობისთვის, სასტუმრო "ცეცე" თუშეთში, სოფელ ომალოში, მკაცრი დაცული ტერიტორიების ზონასთან მდებარეობს. ტურისტულ ობიექტში 30-მდე ადამიანის განთავსებაა შესაძლებელი.
